Журнал «Эпох Таймс»-ай ист.
Алантæ хауынц уыцы рагон адæмтæм, кæцы хъомысдзинад сæхиуыл бавзæрстой æгас Европæйы цæрджытæ дæр. Кавказæй æрбацæугæйæ, сæ зæххытæ ауæрæх кодтой суанг Доны онг. Арæх цыдысты стæрты æмæ бырстой Чысыл Азимæ æмæ Сомихмæ. Нæ дуджы фæндзæм æнусы ныббырстой Галлимæ (нырыккон Франц) æмæ Италимæ, вандалтимæ бахæццæ сты суанг Испанимæ дæр. Афтæ нымад цæуы, æмæ алайнаг æвзаг хауы ирайнаг æвзæгтæн сæ хурыскæсæйнаг къордмæ. Бæлвырддæр та, цæгат-хурыскæсæйнаг. Хъæрæсейаг æмæ ирон адæмтæ сæхи хонынц æмæ нымайынц аланты фæдонтыл. Уымæн схуыдтой Цæгат Ирыстоны – Алани дæр.
Фæлæ аланты тыххæй бирæ æрмæг нæй фыст. Бæлвырддæр та зæгъæн ис, æмæ æрмæстдæр римаг æмæ бердзенаг историкты куыстытæй ис сбæрæг кæнæн сæ фæдтæ. Диониси аланты хуыдта "хъомысджын æмæ тыхджын адæм"; стæй фысста, куыд иттæг хорз æмæ зындгонд барджытæ сты уый. Аммиан дзырдта, алантæ æгасæйдæр кæй сты "бæрзонд, рæсугъд, хæрзконд æмæ райдзаст адæм". Цæугæцардгæнджытæ уæвгæйæ, сæ царды сæйрагдæр бынат ахста фосдарыны куыст. Антикон бæстæйы цы цагъарад уыдис, уымæн аланты царды бынат никуы уыдис. Иуæй-иу историкон æрмæджытæ ууыл дзурæг сты, æмæ алантæм кæй уыдис полигами (ома иу лæгæн хатгай уыдис цалдæр усы). Кæд æмæ сæм кувæндæттæ нæ уыд, уæд куывтой æрмæстдæр иу дзуармæ - Хæсты дзуарæн æмæ зæххы сагъд æндон цирхъæн. Уыдонæй æрæджиаудæр фыст æрмæджытæ ма дзурæг сты, алантæ сæ фыдæлты удтæм дæр кæй куывтой. Адæимаг хæсты быдыры тохы мидæг куы марди, уæд нымад уыди "амондджын мардыл"; ома, стыр кад скодта Хæсты дзуарæн. Ахæм мæрдтæ уыдысты, алантæм гæсгæ, кад æмæ намысы аккаг. Ноджы ма архайдтой фидæн сбæрæг кæныныл. Ома сæм парахатæй уыди дæсныдзинад дæр, кæцы сæм фæзынди, æвæццæгæн, Хурыскæсæнæй. Бæлвырд у уый, æмæ алантæ, Хурныгуылæнырдæм цæуыны размæ, æнгом бастдзинад дардтой Китайы адæмимæ. Фидæн та иртæстой хæрисы уистæй. Уисты бындзыг-иу зæххмæ æрæппæрстой æмæ сæ хаудмæ гæсгæ дæсны касти фидæны хабæрттæ. Аланты æхсæнад, кæй зæгъын æй хъæуы, тынгдæр 'здæхт уыди хæсты 'рдæм, æмæ уымæ гæсгæ сæ лæппутæ чысылæй сæхи ахуыр кодтой бæхыл бадын, сæ хистæртæ сын амыдтой хорз барæджы дæсниад. Се'фсæддонтæ сæ сæрмæ нæ хастой фистæгæй цæуын. æппæтæй æхсызгондæр куыстыл намадтой бæхтæдарыны куыст. Алайнаг бæхтæ зындгонд уыдысты æндæр адæмтæм дæр.
Иу цымыдисон æууæл ма сæм уыдис ноджыдæр. Уый уыдис сæ зæрдæйы ахаст ацæргæ адæммæ. Гермайнаг адæмтæ дæр къаддæр хæстмондагдæр нæ уыдысты. Фæлæ кад кодтой сæ зæрæттæн, нымадтой сæ зондджын æмæ фæлтæрд адæмыл. Алантæм та уыди æндæр хъуыды. Ома, кæд хæсты быдыры нæ фæмард дæ, æмæ ныр дæ бон хæцын нал у, уæд дæ тæппуд. Зæрæтты ницæмæ дардтой. Æмæ сыл, æвæццæгæн, уыцы цæстæнгас рацыдис гадзрахатæй. Кæд гермайнаг адæмтæн сæ бон бацис бындур сæвæрын хъаруджын æмæ стыр паддзахæдтæн,( кæцытæ: Герман, Австри æмæ Скандинавийы æрдæгсакъадахы паддзахæдтæ - ма ныры онг дæр дидинæг калынц), уæд кæддæры хъомысджын аланты та рохуаты дон фæласта, иугай ныййисты, ныппырх сты фæйнæрдæм æмæ æндæр адæмтимæ сæмхæццæ сты.
Бæцойты Сосланы тæлмацæй.
Фиппаинаг сайт «Ирон Адæм»-ы саразджытæй.
Куыд уынæм афтæмæй фæсарæйнаг журналисттæй чидæртæ ирон адæмы нырыккон истори иттæг хорз нæ зонынц.Уæлдæр цы миниуæг хæссынц дæнцæгæн, уый уыдис рагон скифтæм. Æвдыст цæуы Геродоты фыстыты. Ирон адæмы царды æгъдау бирæ цæмæйдæрты у бынтон æндæргъуызон. Æнустæй нырмæ ирон царды бындуртæн сæ фидардæртæй иу уыдис хистæрæн кад кæнын æмæ йын йæ зондмæ хъусын. Хистæртæй кæстæртæм цыдис фарн æмæ царды фæлтæрдзинад, уыимæ хæстон ахуыр æмæ уагæвæрдтæ дæр.
