Ирон чьиритæм хауынц:  

- уæлибыхтæ, хæбизджынтæ 

- фыдджынтæ 

- цæхæраджынтæ 

- къабускаджынтæ 

- картофджынтæ 

- насджынтæ 

- давонджынтæ 

- хъæдурджынтæ 

Раджы заманы ма-иу кодтой фиуджынтæ дæр. 

Уыдонæн сеппæтæн дæр сæ хыссæ кæнынц иугъуызон (кæс нывтæм). Стæй алы æфсин дæр йæ кæрдзынтæм йæхи дæсныйад хæссы. Уымæ гæсгæ сын нæй иумæйаг универсалон рецепт дæр. Иумæйаг у æрмæстдæр нæ фынджы æгъдау. Æмæ уыцы æгъдау амоны ирон фынгыл æртæ кардзыны (чьирийы) æвæрын, уæлдайдæр та Хуцаумæ кувгæйæ. Дыууæ кæрдзыны æвæрынц æрмæстдæр зианы фынгыл. Æмæ уæ Хуцау ахæм хъуыддæгтæй бахизæд.  

Мæнæ уын нывтæм гæсгæ ирон чьиритæ кæныны æгъдау.  

Бахъæудзæн нæ: æнхъизæн, цæхх, æхсыр, иу чысыл зети (зайæгойты сой), ссад æмæ хъæрмуст дон.  

Æнхъизæн агуывзæйы. Кæнынц æй иу цайы уидыг хус дрожжæй, иу уидыг сæкæр æмæ хъæрмуст донæй. Йæ фынк хъуамæ ссæуа хæрдмæ - уæд у цæттæ. 

Ирон цыхт 

Арынг дæр уæ бахъæудзæн 

Ссады къус 

Иу уыйбæрц æм æфтауæм цæхх. 

Кæнæм ыл æнхъизæн. 

Хъæрмуст донимæ йæ змæнтын райдайæм, астæуæй кæрæттæм. 

Хуыздæр адæн ис бафтауæн иу чысыл æхсыр. 

Бафтауæм 30 г. зети (уырыссагау- растительное масло, англисагау - cooking oil) цæмæй хыссæ къусы къултыл мауал хæца. 

Æрæмбырд кодтам хыссæ иумæ.. 

Исты целофанæй йæ æнгом нымбæрзтам, æмæ йæ ныууагътæм нæрсынмæ. 

Ацы хатт цæхæраджынтæ.  

Бафтауæн ма ис хъæдындзы сыфтæ, хъонтхъоратæ æмæ æндæр кæрдæджытæ, фæлæ бирæтæ кæнынц æнæ уыдонæй дæр. 

Цæхæрайы сыфтæ лыстæг скарстам. 

Иннæтæ дæр афтæ. 

Уыцы рæстæгмæ хыссæ дæр снæрсти. 

Ныр уый кой кæнын афон у. 

Ссадæй дзаг арынгыл æй æвæрæм. 

Æртæ чьирийы хыссæ радих кодтам. 

Ныр ныккæнын хъæуы цæхх. 

Бафтыдтам æм 500-700 г. цыхт æмæ йæ дзæбæх сæзмæстам. 

Кæд уæм фæкæса лæхъиргомау, уæд ма йыл акæнæн ис ссад. 

Цæттæ у ныр. 

Пец стæвд кодтам æмæ тебæтæ цæттæ. 

Хыссæ тъæпæн кæнæм къухтæй (армæй). 

Цæхæрайы змæст æркодтам астæуæй. 

Кæрæттæ æрбамбырд кодтам. 

Астæуæй сæ баиу кодтам æмæ йын йæ цъупп ралыг кодтам. 

Ногæй та йæ тъæпæн кæнæм: уæлейæ бынмæ, астæуæй кæрæттæм. 

Æрфæлдæхтам æй дæлгоммæ æмæ та йæ афтæмæй дæр арæхстгай тъæпæн кæнæм. 

Дыууæ къухæй йæ систам æмæ æвæрæм тебæйыл. 

Ам дæр ма йæ тебæ æнæхъæнæй куыд бацахса, афтæ аразæм. 

Ныр ын пецмæ афон у. 

Фыццаг чьири æвæрæм бынæй, стæй йæ быныл куы нæл хæца, уæд æй раивдзыстæм уæлæмæ. Йæ бынаты та йын сæвæрдзыстæм дыгкаг. 

Куыд цæттæ кæнынц, афтæ сæ пецæй исæм, æмæ сын сæ сæртæ æмæ фæрстæ бæстон сæрдæм царвæй кæнæ та нæлхæйæ. Уый сæ сфæлмæн кæндзæн. 

Æртæ кæрдзыны цæттæ сты. Фынгмæ хæссын афон сын у. 

Фыдджинаджы конд.  

Нæ фыдæлтæ фыдджинаг кодтой фысы фыд æмæ стуры фыдæй. Фæлмæн, æнæстæг дзидза-иу дзæбæх ныххостой (ныллыстæг кодтой) чысыл фæрæтæй къуыдырыл, кæнæ бæзджын фæйнæгыл. Стæй иу ыл ныккодтой цæхх, бырц, хъæдындзы æмæ нурый бынтæ тынг лыстæг карстæй. Уыдонимæ-иу фыдджинаг дзæбæх сæзмæстой къухæй (армæй) æмæ-иу æй бауагътой сахаты бæрц, цæмæй дзидзайы сæ ад ахъара. Уый фæстæ цæттæ уыдис фыдджынтæ кæнынмæ.  

Фыдджын цæттæйæ. 

Ацы нывтæ æмæ амындтæ мах мыхуыыр кæнæм ирон чьиритæ чи никуы скодта уыдонæн æххуысæн. Бирæтæн нæ вæййы фадат искæйы кондмæ бакæсын. Мæ фæзивæг кæнут, чызджытæ. Бафæлварут скæнын чьиритæ, æмæ нæ фæфæсмон кæндзыстут. Чи зоны уын ацы дæсныйад хуыздæр амонды ахъаз фæуа. Исты фарстатæ уæм куы уа, уæд та иу мæм ныффыссут сайты администраторы адрисмæ. 

Хорз уаид, æмæ уæ хъуыдытæ куы раргом кæниккат арфæты сæргонды 

(Уыдзæн ма. Арæхдæр-иу æрбауайут)