Хъантемыраты Олег  

(1951) 

Цæгат Ирыстоны Сгуыхт Артист. 

Кино æмæ цирчы зындгонд архайæг, Каратэйы Япойнаг Федерацийы (JFK) 4 -æм данæй хорзæхджын. 

Хъантемыраты Дауырбеджы фырт Олег райгуырдис 1951 азы Дзæуджыхъæуы. Чысылæй фæстæмæ рæзти тынг цæрдæг æмæ хъæддыхæй, спорты алы хуызтæм зæрдæргъæвдæй. Хъæбысæй хæцыдис, архайдта дзю-до æмæ боксæй дæр. Фæстæдæр каст фæцис Цæгат Ирыстоны паддзахадон университеты физкультурон факультет. Дарддæр æй йæ царды фæндаг ахаста Мæскуымæ. Куыста йæ номдзыд æрвадæлты цирчы. Уым архайдта бирæ цымыдисаг равдыстыты, фæзылдис дунейы бирæ паддзахадтыл.  

Цирчы куыстæй уæлдай ма Олег сарæзта каратэйы зындгонд скъола, кæцы фæстæдæр басгуыхтис Уæрæсейы хуыздæртимæ. Бирæ зындгонд адæмы сахуыр кодта Олег йæ дæсныйадыл. Бирæтæ дзы байгом кодтой сæхи скъолатæ дæр. Уыдонæй иу у Хъантемыраты Барис, Уæрæсейы федерацийы сгуыхт тренер, кæцы йæхи хъæппæрисæй сæвæртта бындур Ирыстоны спортивон каратэйæн æмæ схъомыл кодта дунеон къласы каратисттæ.  

Куыд артист, Олег архайдта цалдæр кинойы. Уыдонæй сæ зындгондæртæ сты: «Фанат», «Фанат-2», «Пираты 20 века», «Не бойся я с тобой», «Человек в зеленом кимоно».  

90-æм æзты Олег æрцарди Канадæйы. Куыста зындгонд «Дю Солейы» цирчы Монреалы. Стæй та йæ бинойнаг, зындгонд цирчы гимнасткæ Татьяна Зубрилинаимæ сарæзта йæхи цирчы скъола Торонтойы æмæ абон дæр уым кусы .