Æгас цу, Уазæг
Регистраци| Бацæуын
Внимание! При любом использовании материалов сайта, ссылка на www.ossetians.com обязательна!
Ирон Русский English



Проект по истории и культуре Осетии и осетин - iriston.com iudzinad.ru





Rambler's Top100 Индекс цитирования

Историон æцæгдзинад æви æрымысгæ цау
< фæстæмæ  Фиппаинæгтæ (0)      Мыхуыры рауадзын

Историон æцæгдзинад æви æрымысгæ цау
 

 

 

Алы адæм дæр сæ уидæгтæ агурынц историйы. Нæ историйы тар бынæттæм ныккæсынмæ цымыдис кæнæм мах, ирон адæм дæр. Æмæ истори нымайын, нæхион нæхи хонын хорз у. Æнæ ивгъуыд нæй фидæн, фæлæ нæ уæддæр арæх не сгухт адæмæй бирæтæ ферох вæййынц. 

 

Ныр æртыккаг æнус ирон адæм кæнынц таурæгъон Мамиаты Хъарадзау æмæ паддзах Екатеринæ дыккаджы фембæлды кой, фæлæ ахæм историон цауы тыххæй иунæг официалон документ къухты кæй нæма ис, уый алчи нæ зоны. Æппæт ацы ныхæстæ, Хъарадзау æмæ йæ балцы кой, æрмæстдæр баззад фольклорон æрмæджытæ “Куыртаттæгты зарæг”, “Куыртаттæгты фæмарды тыххæй зарæг”, “Биаслантæ æмæ куыртаттæгты тох”, “Куыртаттæгты балц” æмæ æндæрты. Дзыхæйдзургæ сфæлдыстад та, бæрæг куыд у, афтæмæй алы хуызы æвдисы хъуыддаг. Уымæ гæсгæ ахæм æрмæджытæ иу бæлвырд историон рæстдзинад не ‘вдисынц æмæ не сты. Фольклорон таурæгътæ информацион жанры уацмыстæ сты, ис сæм историон рæстдзинады комулæфт, фæлæ сын алы хатт нæй историон факттыл нымайæн. 

 

Историк Блиты Марк куыд нымадта, афтæмæй “Осетинское посольство Мамиева Карадзауа относится, по нашему мнении, к 1787 г. Она имела встречу с Екатериной II в Крыму. Политической целью этой встречи было подтверждение русского подданства осетин. О том, что представители Осетии выразили тогда верность России, свидетельствует грамота, подарки и крещение, которые приняли они от Екатерины II и ее сановников. Это было важно для России, начавшей в том же, 1787 г., войну с Турцией”. (“Посольства Карадзау Мамиева”). 

 

Ахæм фембæлд ахсджиаг кæй уыд, уый бæрæг у, фæлæ кæм уыд, уый ницæмæй бæлвырд кæнынц нæ ахуыргæндтæ дæр фольклорон æрмæджытæй дарддæр. 

 

Таурæгътæм гæсгæ, 1787 азы Турк йæхи цæттæ кæнын райдыдта Уæрæсеимæ хæстмæ. Уыцы аз паддзах Екатеринæ II сфæнд кодта, уый размæ йæм чи æрбаиу, уыцы зæххытыл азилын. Фæндыд æй йæ арæнты фидардзинад сбæрæг кæнын, йæ ног зæххыты цæрджытæ йын цы аргъ кæнынц, уый фенын. Паддзахæн йæ балц уыд Хъырыммæ æмæ йæ ног территоритыл цæрæг адæмтæм арвыста хонæн гæххæттытæ. Ахæм гæххæтт æрцыд Ирыстонмæ дæр, таурæгътæм гæсгæ, хъулон гæххæтт. Фæхæццæ йæ кодтой Нармæ Мамиаты Хъарадзаумæ. Уый хорз зыдта уырыссаг грамотæ. Фыстæг куы бакаст, уæд Ирыстоны дзырддзæугæ лæгтæй скодта делегаци иу дыууиссæдз адæймагæй, йæхæдæг сæ сæргъы, афтæмæй фæцыдысты Хъырыммæ. Уыцы фембæлдæн уыди стыр нысаниуæг. Хъарадзау æмæ паддзах ныхас кодтой бирæ ахсджиаг хъуыддæгтыл. Хъарадзау ныфс бавæрдта Туркимæ хæсты ирæттæ дæр се ‘ххуысы хай кæй бакæндзысты. Ирон делегацийы рарвыстой тынг буцæй. Цыппор цæды галтыл ластой сæ лæвæрттæ, стæй грамотæ, бирæтæ дзы райстой чырыстон дин. Фæлæ ныры Елхот кæм ис, уырдæм куы æрбахæццæ сты, уæд сæ размæ бабадтысты Кæсæджы хъалтæ. Истой сын сæ фæллой. Бацайдагъ сын тох. Уыцы тохы фæмард сты се ‘ппæт дæр се ‘мбæлццон чысыл лæппу Гуыриаты Ахмæтæй дарддæр. Уый фæстæ йæ æнæзонгæ кæсгон лæг æркодта Ирыстонмæ, æрхаста грамотæ дæр. Уый бирæ азтæ фæцис Нары аргъуаны. Уыцы грамотæйы кой кодта Къоста дæр йæ поэмæ “Особа”-йы, фæлæ йæ чи федта, ахæм æвдисæнтæ нæй. 

Ахæм у дзыхæйдзургæ æрмæджыты иумæйаг мидис æнæ иунæг историон документæй. Мæ нымадмæ гæсгæ, фембæлд иугæр Хъырымы уыд, уæд уым, æнæмæнг, историон музейтæ æмæ архивты баззадаиккой исты ахсджиаг документтæ æмæ мæ мæ журналисты цымыдис балæууын кодта Хъырымаг горæттæй цалдæры, фæлæ фыдæнхъæл фæдæн. Фыццагдæр бабæрæг кодтон Ялтæ æмæ Алуштайы историон æмæ бæстæзонæн музейтæ, фæлæ йæ кусджытæй ахæм цауы тыххæй хъусгæ дæр ничи фæкодта. Экспонатты дæр, зæрдæ цæуыл фæлæууа, ахæмæй ницы разынд. Мæ ныфс ма уыд хъырымы сæйраг горæт Симферополь, фæлæ уым дæр дыууæ историон музейы ногæй ницы фехъуыстон. Уæвгæй та дзы паддзах Екатеринæйы балц Хъырыммæйы тыххæй уыди дунейы æрмæджытæ, нывтæ, экспонаттæ, фæлæ дзы ирæтты фæд ничердыгæй разынд. Мæ размæ мын рахастой историкты уыцы балцыл фыст чингуытæ “Екатерина IIи Крым. Было пора: Екатеринин век”, “Путь на пользу” æмæ “Григорий Потемкин. Губернатор Новороссии и Тавриды”. Сыфгай сæ фæфæлдæхтон æмæ сæм лæмбынæг фæкастæн, уыд дзы падзах кæд æмæ кæимæ фембæлд, уыдæттæ, фæлæ дзы ирон бæлцæтты кой никуы уыдис. 

 

Бæрæг куыд у, афтæмæй паддзахы балц Уæрæсейы горæттæ Мæскуы, Белгород, Новгород, Тула, Таганрог, Курск æмæ æндæртыл ахаста æхсæз мæйы. Уыдонæй æрмæстдæр дыууадæс боны фæцис Хъырымы горæттæ Судакы, Бахчисарайы, Балаклавайы, Старый Крымы, Перекопскы æмæ Феодосияйы. 

Уый размæ куыд фехъуыстон, афтæмæй паддзах фылдæр рæстæг баззад хъырымаг горæт Бахчисарайы. Симферополы музейы кусджытæ мæ куырдиатмæ гæсгæ фæдзырдтой Бахчисараймæ, фæлæ та уым дæр ницы разынд. Куыд загътой, афтæмæй ацы горæты дæр дыууæ боны йедтæмæ нæ баззад, 20-22 маймæ. Музейы мæм цы чингуытæ равдыстой, уыдонæй “Путь на пользу”-йы лæмбынæг фыст æрцыд йæ алы фембæлд дæр. 227 фарсыл кæсæм: “Бахчисарай, село Заветное. В походной церкви старооскольского полка состоялась литургия в присутствии ЕкатериныII. Жалование к руке. Обед. Прием грузинского царевича Давида. Общение со свитой и императором Иосифом-2. ужин. Ночлег”. Æмæ афтæ дарддæр. Уый у ацы горæты йæ фембæлдтыты хронологион равæрд. Автор бæлвырд фыссы Хъырымы иннæ горæтты дæр паддзахыл цытджын уагæй, цæхх æмæ кæрдзынимæ кæд æмæ кæм сæмбæлдысты: черкесаг æмæ тæтæйраг легионтæ, гуырдзыйы минæвæрттæ, хъырымаг хантæ, тæтæйраг чызджытæ – амазонкæтæ, æфсæддон разамонджытæ æмæ афтæ дарддæр. Уыдонæн сæ нысан уыд, Уæрæсейыл куыд иузæрдион сты,уый равдисын. Уыимæ бæлвырд фыст сты йæ официалон фембæлдтытæ дæр уæрæсейаг æмæ фæсарæйнаг дипломаттимæ, фидæны Турчы æрбабырсты ныхмæ цавæр мадзæлттæ хъæудзæн, уый фæдыл. Фæлæ, ноджыдæр æй зæгъын, иу ран дæр дзы ирон минæварады кой нæ уыд. 

 

Музейты кусджытæ мын куыд бауынаффæ кæдтой, афтæмæй историон документтæ агурын растдæр уаид архивты. Уымæ гæсгæ балæууыдтæн Симферополы паддзахадон архивы, фæлæ, хъыгагæн, августы мæй кæй уыд, уымæ гæсгæ йæ кусджытæ уыдысты отпусчы. Архивтæ уыдысты æхгæд. Фæлæ дзы уæддæр мæ къухы бафтыд наукон кусджытæй иуимæ аныхас кæнын. Уый мын куыд загъта, афтæмæй сæ архивты æрмæджыты ахæм цауыл йæ цæст никуы æрхæцыд. Екатеринæйы балцы æмæ фембæлдтыты тыххæй та ахсджиаг документтæ иууылдæр æфснайд сты Петербурджы архивты. Хъырымы дзы ссарæн ницы ис историкты фыст чингуытæй дарддæр. 

Мæнмæ гæсгæ, архивы кусæджы ныхасæн арфдæр бындур ис. Кæй зæгъын æй хъæуы, паддзах Хъырыммæ иунæгæй не ‘рцыд, фæлæ йемæ уыдысты сенатортæ, историктæ, хæстон разамонджытæ, фæсарæйнаг дипломаттæ, алыхуызон æххуысгæнджытæ… Историон документтæм гæсгæ, æртæ мин адæймаджы. Уыдонæй хæсгонд кæмæн уыд, уыдон лæмбынæг фыстаиккой паддзахы балцы хабæрттæ æмæ сæ, æнæмæнг, аластаиккой Петербургмæ, куыд ахсджиаг официалон документтæ, афтæ. Фæлæ, хъыгагæн, Хъарадзау æмæ йæ делегацийы фæд абоны онг Петербурджы архивты агурæг нæ фæцис. 

Уæдæ фольклорон бынтыл æнцой кæнгæйæ, Мамиаты Хъарадзау æмæ йе ‘мбæлтты минæварад гуырысхойаг нæу. Фæлæ нырмæ дæр историон литературæйы нæй дзуапп бирæ фæрстытæн: чи уыд Хъарадзау, кæм æмæ кæд уыд йæ фембæлд паддзахимæ, цæй фæдыл ацыдысты Уæрæсемæ, цавæр реалон цаутæ æвдисынц Хъарадзауимæ баст таурæгътæ æмæ зарджытæ æмæ афтæ дарддæр. 

Ахуыргонд историк Бзарты Русланы хъуыдымæ гæсгæ, ирон минæварад Хъырыммæ ныххæццæ уыдаид, уый зын бауырнæн у. Растдæр уыдзæн йæ балцы рæстæджы йыл æндæр ран кæй фембæлдаиккой. Уымæ гæсгæ, Хъырымы ирон минæварады фæдтæ агурын мур дæр ницы ратдзæн. 

 

Таурæгъгæнджытæ хъуыддаг алыхуызон æвдисынц. Иу ран минæварад паддзахимæ фембæлд Екатеринограды (уæды Шепаче), иннæ ран – Петербурджы… Ам, мæнмæ гæсгæ, таурæгъгæнджытæй чидæртæ хæццæ кæнынц ацы балц фыццаг минæварадимæ, кæцы ацыд Петербургмæ 1749 азы Магкаты Зурабы сæргълæудæй. Æвæццæгæн, адонæй растдæр уаид Æмбалты Цоцкъойы фыст æрмæг: 

“Представители Осетии во главе с Карадзау Мамиевым были в пути 2 месяца. Сначала они приехали в Ставрополь, где они должны были встретиться с Екатериной II. Но в Ставрополе императрицы не оказалось. Тогда решили поехать ей навстречу. Легенда не называет точно место встречи, но указание о том, что они направилис навстречу Екатерине 2, весьма ценна, так как оно больше всего согласуется со следующими историческими фактами”. 

Дзырд дæр ыл нæй. Мамиаты Хъарадзау йæ минæварадимæ паддзахимæ фембæлынмæ куынæ ацыдаид, уæд уый тыххæй уыйæппæт фольклорон бынтæ нæ баззадаит. Уый нысан кæны: уыд ахæм цау Ирыстоны историйы. Фæлæ, хъыгагæн, йæ рæстæгыл ничи фæцарæхст уыдон официалон документтæм бахæссын æмæ рæстæджы фæлмы батадысты. Ахсджиагдæр документтæ та, уырны мæ, æфснайд уыдзысты Петербурджы архивты. Хорз уаид, нæ ахуыргæндтæ сæ бацагурыныл куы батыхсиккой. Ахæм историон цау искуы рохуаты баззайа, уымæн нæй æруадзæн. 

Мамиаты фæрнджын мыггаджы минæвар, æхсæнадон архайæг Таймураз ныр цалдæр азы æмбырд кæны йæ кадджын фыдæлы тыххæй æрмæг, цæмæй сæ чиныгæй рауадза. Мургай æмбырд кæны, цы фехъусы, уыдон. Йæ зæрдæ дары, æрмæгæй йын, æнæмæнг, исчи кæй баххуыс кæндзæн æмæ таурæгъон Хъарадзауы кой кæй никуы фесæфдзæн. Таймураз арфæйаг хъуыддаг аразы æмæ мæ ныфс ис, йæ бæллиц йæ къухы кæй бафтдзæн. Хъарадзауы хуызæн адæймæгтæ æрмæст сæ мыггаджы не сты, фæлæ сæ нацийы хъæбатыртæ… 

 

Джусойты Нинæ



 Фиппаинæгтæ (0)      Мыхуыры рауадзын
 
Зындгонд ирæттæ