Тъурити Къостæ
Зæринæ - паддзахи кизгæ
(Тауæрæхъ – аргъау)
Нæ фиддæлтæ алантæ– дигорæн Сау денгази билтæй æгас дуйнебæл рапурх æнцæ сæ зæнхитæ. Сæ паддзахади сæргъи еу дзамани лæудтæй паддзах Асдигор. Æ кади кой игъустгонд адтæй æгас дуйнетæбæл. Адтæй ин еунæг кизгæ – Зæринæ. Зæринæ ку райгурдæй, уæд æ ниййерæг мадæ Баресгæ уæззау незæй фæссæйгæ æй, уæлæбæл царди рахгæдта æ цæститæ æма бакъахдзæф кодта мæрдти Барастæри тар бæстæмæ.
Берæ цæстисугтæй фехснадта Асдигор æхе, фел ин æ зæрдæ ба æ цардæмбали фæсте рохс кодта æ еунæг уарзон саби. Тухæ, нифс æма уæлдай æнцондзийнадæ ин лæвардтонцæ æ минкъий кизгæ Зæрини æвзонг бонтæ.
Алантæ адтæнцæ тохæг адæм, фал еци рæстæг ба еу минкъий басабур æнцæ тугъдон балцитæй. Паддзах фулдæр рæстæг æрвиста æ бæдоли хæццæ. Æ фæллад тугъдон цæсгонбæл цийни æртæхтæ арæхæй-арæхдæр зиннун байдæдтонцæ æ кизги райгурди фæсте. Зæрини цæститæмæ кæсгæй, цид, æ зæрди арæх æфтудæй æ уарзон бийнойнаг Баресгæ æма-еу уæд æнкъард гъудити рандæ уидæ. Æнзтæ цудæнцæ. Аланти паддзахадæ тухгинæй-тухгиндæр, гъæддугæй-гъæздугдæр кодта. Сæ зæнхитæ, сæ фонси æргъæуттæн ниггæнæнтæ нæбал адтæй.
Паддзахадæмæ алли идард бæститæй сæудегергæнæг адæм арæхæй-арæхдæр цудæнцæ. Еци хабæрттæ æригъуста тæтæр – мангойлаг хан. Рагæй æй фæндæ адтæй хæстæгдæр, лæмбунæгдæр базонун, – дуйнетæбæл сæ кой кæмæн райгъустæй, еци адæмихатти. Хуцауæй фæстæмæ æй неке зудта, ханмæ ци мæнгард фæндитæ адтæй, уой. Рарвиста æ фæсдзæуинттæ æ лæвæртти хæццæ, уæдта æ финстæг, Паддзах Асдигор исиуазæг кодта тæтæр-манголи минæвæртти. Райарфæ кодта син хани лæвæртти туххæй, уæдта бакастæй финстæг æма лæмбунæг загъта æ зæгъуйнаг:
– Мах, алантæ-дигорæ ан Хуцауи исконд адæм, Хори Цæуæт. Кæддæриддæр иуазæг махæн уæлдай кадгин æй, уæдта уодзæй. Кæд хани зæрдæй фæндуй мах хæццæ балимæн ун: дæдтуй нæмæ хæлардзийнади къох, уæд имæ мах ба дæдтæн нæ дууæ къохи. Кæд æмæ ханмæ æндæр – тар, сосæг, мæнгард гъудитæ ес, уæдта уин зæгъун æргомæй, – махмæ тохæндзаумауи хæццæ ка исфæндæ кæна æрбацæун, ейæ дæрæнгонд ке æрцæудзæнæй. Табу дæхецæн, устур Хуцау! Сумахмæ ковун, нæ кадгин изæдтæ, æма нин агъазгæнæг уотæ. Ниффедар нин кæнтæ нæ хæлардзийнадæ нæ нæуæг зонгити хæццæ. Нæ адæмтæ хæларæй цæрæнтæ! Ейæ уин мæ дзуапп æма æй исæмбæлун кæнтæ ханбæл.
Ниллæг сæ сæртæй ракувтонцæ тæтæр-манголи минæвæрттæ æма алайнаг паддзахи загъд тагъддæр фегъосун кæнæн, зæгъгæ, рараст æнцæ хани бæстæмæ.
Рæстæг цудæй. Паддзахи кизгæ багъомбæл æй. Æ кой райгъустæй æгас дуйнетæбæл. Адæм дзурдтонцæ: «Берæ деденгутæ ес будурти, цъæх игуæрдæнтæ æма æрдозити, фал си паддзахи кизгæ – Зæрини рæсугъдæн ба неке æй. Берæ рæсугъдтæ ес дуйнетæбæл, фал Зæринæ ба æгасемæй дæр рæсугъддæр æй!» Кизги еу фæууиндæй адæймаг æ медбунат æ фур десæй цавддор фестидæ, æ цæститæ райсун нæбал бафæразидæ Зæрини цæсгонæй. Кизги десæй беретæ паддзахæн феронх уиуонцæ раковун.
Куддæр-еу фиццаг хори фæлмæн, гъар тунтæ разиниуонцæ сæумон мегъти фæстейæй, уотæ арви рæсугъддæр æ хуссæнуати æ сау дууæ рæсугъд цæсти байгон кæнидæ, раистгæй æ уорс бауæрбæл, æ дессаг гурæбæл æркæнидæ æ цилле сугъзæринæ, мулинæ хæлттæй конд, пъолци. Æ даргъ дзигкотæ рæуæг æркалидæ æ нарæг фæсонтæбæл æма фæлмæн къахдзæфтæй бацæуидæ къæразги размæ, цæмæй æ цæстæнгас рахæсса сæумон æрдзи рæсугъддзийнæдтæбæл. Зæринæ-еу кастæй къæразгæй æма æ зæрдæ цийнæ кодта. Æнæдзоргæй гъуди кодта; «Куд рæсугъд æй фиддæлти зæнхæ! Куд рæсугъд æнцæ алфанбулай ци гъæдтæ, дæнттæ æма хуæнхтæ ес!»
Фал Зæринæ уонæй рæсугъддæр æма дессагдæр ке æй, уобæл ба нæ гъуди кодта. Е 'ригон кизгон тог ин рæсугъд кодта æ фæлмæн сурх ростæ, хори тунтæмæ æ цæсгон цийни æрттивд кодта, идардмæ æ даргъ къæлæт æрфгути буни цæститæ цæхæр калдтонцæ, арви стъалутау. Кизгæ берæ уарзта æ фидæ Асдигори æма-еу, æ размæ балæугæй, арæх æхе нилхъевидæ æ фиди реумæ, уарзон сабийау. Зæронд паддзах æ цæстисугтæ æркалидæ фур цийнæй. Æ кизгæ бонæй-бонмæ устурæй-устурдæр кодта, рæсугъдæй-рæсугъддæр. Арфæ кодта Хуцауæн, уæхæн лæвар ин ке ракодта æма имæ кувта:
– О, Хуцау! Хуцæутти Хуцау! Табу дæхецæн! Равардтай мин устур амондæн Зæрини. Æз ниййердтон аци деденæги æма æй исирæзун кодтон. Мæхе Зæринæ, мæн дæ!
Рæстæг евгъудæй. Галауан мæсугæй фæзæмæ рацæугæй, Зæринæ уарзта деденгутæ æмбурд кæнун, цъеути рæсугъд зарунмæ игъосун. Изæрæй-еу, æ фиди хæццæ фембæлгæй, уарзта уой тауæрæхътæмæ игъосун, уæлдайдæр ба тугъдон рæстæгути туххæй. Гъеууотæ цардæй паддзахи кизгæ Зæринæ æма ибæл уотемæй ралæудтæй æ нæудæсæймаг уалдзæг.
* * *
Еу хатт, мæсуги алливарс ци рæзæ бæлæстæ ирæзтæй, уони буни рацо-бацо кæнгæй, æваст æ гъостæбæл рауадæнцæ рæсугъд зари зæлтæ, дала фæндури цагъд. Лæмбунæг игъосгæй, Зæринæ арф гъудити рандæ æй: «Цума ка æй, уотæ æнкъард æма зæрдæмæцæугæ рæсугъд зар ка кæнуй, ейæ? Æвæдзи, уæхæн адæймаг уодзæй æма æ царди берæ зиндзийнæдтæ ка фæууидта...»
Кизгæ æхе хæстæгдæр баиста, зар кæцæй игъустæй, уордæмæ. Дони иннæ фарс ци минкъий, дорæй амад мæсуг хæдзарæ адтæй, уордигæй карзæй-карздæр игъустæй зарун. Уæдмæ æ цæститæ райахæстонцæ æригон лæппой, æ къохти гъесин дала фæндур, æнкъардæй куд зардта, уой.
Зæринæ æхе бæласæмæ нилхъивта æма сосæгкай ециеу каст кодта лæппомæ, кæцимæн адтæй рæсугъд гурæ, æ къæбæлдзуг мудхуз дзигкотæ ба зари хæццæ æ сæрбæл аллирдæмæ рапурх æнцæ. Уæрæх цæстити сæрмæ дууæ къæлæт æрфуги зиндтæнцæ цæргæси базуртау. Кизгæ, зармæ игъосгæй, гъудити рандæ æй, æма æ реуæй исервазтæй цидæр æнахур уолæфт. Æваст зар багъос æй. Бæласи бунæй имæ кадæр ке фегъуста, уой балæдæрдтæй лæппо, æма æ медбунат ралæудтæй. Зæринæ фæууидта æригон лæппой, æ уæле цидæр æнахур уæледарæс: æрвхуз хæдонæ сугъзæринæ цæппæрти хæццæ. Лæудтæй æрвдзавдау. Æ æнкъард, сагъæсхуз цæстæнгас фæййеу æй кизги цæстæнгаси хæццæ. Зæринæ цубур рæстæгмæ расурх æй, æ зæрдæ æ реуи цийни гъæр никкодта: «Ейæ æй, кæмæ бæлдтæн, еци амонди хай!»
Æ цæститæ рæстæгмæ æруагъта, уæдта нæуæгæй сосæг каст бакодта лæхъуæнмæ. Уотæ фæккастæй кизгæмæ, цума æ рагон зонгæмæ кæсуй: «Нæ зудтон æма дуйнебæл ес уæхæн рæсугъд, домбай лæхъуæн? Цæй рæсугъд æй æ гури конд, æ лæуд. Æ цæститæ ба! Æ цæститæ кæсунцæ арви ферттивдау».
Дууæ æригони кастæнцæ сæ кæрæдземæ. Сæ кæрæдземæй син сæ цæстæнгасæн рахецæн кæнæн нæбал адтæй.
Цума ескæцæй кизги зæрдæмæ уалдзигон цъеу батахтæй, уоййау лæхъуæни фæууинд æма зар бауагътонцæ кизги реуи цидæр цийнæ æма гъардзийнадæ. Æрæгиау, æхе æрлæдæргæй, Зæринæ фефсæрми æй æма, æваст æхе фæззелгæй, ралигъдæй уарзондзийнади уацарæй.
Еци бакастгин лæхъуæни туххæй дæр уин радзордзæнæн.
Алантæ-дигори паддзахадæмæ æрбампурстонцæ Персий паддзахи æфсæдтæ. Карз тох раеудагъ æй сæ дууети æхсæн. Паддзах Асдигор, æ домбай æфсади хæццæ истохгæй, дæрæн кодта Персий æфсæдти.
Æ уорс æфсæ бæхбæл æгасей разæй æмпурста алайнаг паддзах. Æ цъерхъ æ къохи, æ уæле е згъæр тахъа æндон уæледарæс, уотемæй фæууинæн адтæй Асдигори тугъди карздæр рауæнти. Еу цæфæн – еу æ нихмæлæугути сагæй-рагъмæ дууæ рафадидæ. Персайнæгтæн се 'фсæддонти рæнгъитæ тæнæгæй-тæнæгдæр кодтонцæ. Цудæй карз тох. Æфсæдти бæхти къахгъæрæй зæнхæ æ медбунати æзмалдæй. Саздахъи фæттæ арвбæл тахтæнцæ сау халæнттау. Тог ивулдæй сурх къанæуттау. Игъустæй цæфти уæззау гъæрзун. Карз тугъд рахаста æртæ боней хори скастæй – æртæ боней хори ниннигулдмæ. Паддзах Асдигор е 'фсæдти хæццæ æртумбул æй, персайнаг æфсæдтæй ма ка байзадæй, уонæбæл æма сæ уацари райста. Персий æфсæдти сæргълæууæг Диссейи унаффæмæ гæсгæ, æфсади сæрмæ ист æрцудæй уорс туруса. Е адтæй уой бæрæггæнæн æма састи бунати фæцæнцæ. Æрбарвиста Диссей алайнаг паддзах Асдигормæ еци турусай хæццæ хабархæсгутæ: «О, цитгин алайнаг паддзах! Сæттун, састи бунати ке байзадтæн ме 'фсади хæццæ, уобæл... Корун ди устур хатир Хуцæутти номæй æма ма ци æфсади хæццæ байзадтæн, уони хæццæ мæн рауадзæ дæ уацарæй, æз ба мæ бæсти паддзахæн фегъосун кæнон, нæ нихмæ ци тухгин, домбай æма федар æфсад лæудтæй, уобæл тухæгæнæг – тухæй ке некæд фæууæлахез уодзæй. Хуцæуттæ! Ци тог, ци æстæгæй конд æнцæ дæ адæм?! Дзурд дæдтун æма уæхæн рæдуд ке нæбал æрцæудзæй тугъди номæй, цалинмæ æз цæрон, уæдмæ. Мæ дзурд раст æма федар цæмæй разинна, уой тухæй ба дин уацайрагæн лæвар кæнун мæ еунæг фурт, ме 'фсæддонти хуæздæр – Ариси».
Асдигор финстæгæй æ цæститæ исиста æма æ размæ ци персайнæгтæ лæудтæй, уонæмæ лæмбунæг бакастæй. Уæдмæ се 'хсæнæй ракъахдзæф кодта размæ æригон æфсæддон – рæсугъд, тухгин гури конди хецау. Бæрæг адтæй, нифс æма имæ хъаурæ ке ес, е. Еу рæстæг паддзах æма æригон лæппо кæрæдземæ лæмбунæг кастæнцæ, уæдта Арис сабургай æ еу уæрагбæл æхе æруагъта æма æ сæрæй ниллæг ракувта паддзахæн. Уотемæй, цæйбæрцæ фæцæй, уæдта паддзах Асдигор æ къох хæрдмæ бæрзонд исиста æма бæзгин хъурæй загъта:
– Исистæ уæлæмæ! Кæд æма дæ ниййерæг æ дзурдтæн лæг разинна, уæд дзурд дæдтун æма æфхуæрд ке не 'рцæудзæнæ. Кай зонуй æма ма дин уой уæлæнхасæн ба, æвæдзи, сæребарæдзийнадæ дæр радтдзæнæн, кæд мæ уацайраг дæ, уæддæр. Зонæ! Дæ фиди сайд дæуæн уодзæй дæ мæлæт. Устур Хуцау дин тæрхонгæнæг уæд!
Еци дзурдти хæццæ персайнаг минæвæрттæ уагъд æрцудæнцæ æма фегъосун кодтонцæ Диссейæн, алайнаг паддзах син сæребарæ ке балæвар кодта.
Асдигор ба е 'фсæдти хæццæ рараст æй райгурæн бæсти æрдæмæ. Æнкъардæй сæ хæццæ цудæй персайнаг уацайраг лæппо Арис дæр. Нæ зонун цæмæн, фал Асдигорæн æ зæрдæмæ фæццудæй æ уацайраг. Бæрæг адтæй æригон ма ке æй, фал имæ уæззау зунд, нифс æма тухæ ке ес, е. Уацайраги бакодтонцæ паддзахи галауанмæ хæстæг, дорæй амад хæдзарæ – мæсуги. Æндæр адæмихатт, æндæр бæстæ, тугъди састи ходуйнаг Арисæн æнцондзийнадæ нæ лæвардтонцæ, æнкъард кодта æхе райгурæн бæстæбæл, уотемæй æрвиста æ бæнттæ. Мæнæ нур ба фæууидта паддзахи кизгæ Зæрини, æма ин е æ зæрди бауагъта цидæр æнахур гъудитæ, æнкъард сагъæстæ. Æрмæстдæр ин е ‘ригои уодæн æнцондзийнадæ лæвардтонцæ æ зартæ æма æ дала фæндур.
Зæринæ дæр, Ариси ци бон фæууидта, еци бонæй фæстæмæ æхецæн бунат нæбал ирдта. Еци рæстæгæй фæстæмæ кизгæ фендæрхузон æй, æ цийни игъæлдзæг худт æ хъурæй нæбал цудæй æма арæх æнкъард гъудити рандæ уидæ. Хуссæг æй нæбал ахæста æ хъурмæ комидзаг нæбал иста. Æ уарзон фидæй римахста æ сосæгдзийнадæ.
Паддзах Асдигор æрлæдæрдтæй, æ кизгæ цидæр ке кæнуй, æма рарвиста хонæг зæронд дæсни – Зæлдамæ, кæци дзæбæх кодта адæми æ кæрдæгутæй. Баргæ фæййархайдта Зæлда кизги исдзæбæх кæнунбæл, фал ей кæрдæгутæй хуастæ неци исагъаз æнцæ паддзахи кизгæн. Бæнттæ евгъудæнцæ. Кизгæ уæлдай æндæрхзон нæ кодта. Паддзахи зæрди тас бацудæй æ кизги мæтæй. Арæх-еу, æ къохтæй æ зæронд уорс рехæ æрсæрфгæй, кувта Хуцаумæ: «О, Хуцæутти Хуцау! Ду – нæ агъазгæнæг! Корун ди æма мин байанхус кæнæ мæ уарзон бæдолæ, мæ еунæг кизгæ – Зæринæн... æ нез ин фæссорæ е 'ригон уодæй. Ма мин бауадзæ мæ еунæгæн æ зинтæ уинун. Æз арази дæн æ бæсти мæ цард радтунмæ дæр. О, Хуцау! Фегъосæ мин мæ кувд, мæ тæрегъæддзийнадæ!» – æма – еу еци дзурдти хæццæ æ ростæбæл цæстисугтæ æркалдæй.
Кизгæ ма еци æнкъардæй цалдæр хатти рацудæй бæлæсти бунмæ, кæд æма, ке бауарзта уотæ берæ, уой фæууинон, зæгъгæ, фал лæппо некæцæй зиндтæй æ мæсуги хурфæй, нæбал игъустæнцæ, кизги зæрдæ ка басугъта, еци æнкъард зартæ дæр æма уæд бунтондæр тайун байдæдта. Нихъхъан æй æ хуссæн уати æмæ æнкъард цæстæнгасæй кастæй цармæ. Цæмæй зудта Зæринæ, – еци незæй айдагъ е нæ фæссæйгæ æй, æвзонг лæппой реуи дæр уарзти пеллон арт ке иссугъдæй.
Ариси сæри гъудитæ аллирдæмæ цудæнцæ. Зудта Арис, Зæринæ паддзахи кизгæ ке æй, æ рæсугъд фæндæнттæй ке неци рауайдзæнæй, уой. Гъуди, цид, кодта мæтъæлæй: «Æз ка дæн?! Æндæр зæнхон, уацайраг. Паддзах ку базона Мæ уарзт æ кизгæмæ, уæд мæ цардæн æ кæрон æрцæудзæй. Ехх, тæходуй, цæргæс фестæ, уæд мæ базури буни мæ уарзон бæлæуи идард фæххæссинæ... Уогæ ба цæй æнамонд дæи, цæй æнамонд! Куд федар баст æнцæ мæ бартæ. Нæ, æз мæ уарзт мæ реуи нæ бауадздзæнæн бахуссун кæнун. Кенæ нæ уарзондзийнадæ баеу уодзæй паддзахи кизгæ – Зæрини хæццæ, кенæдта – фæлтау мæлæт... О, Хуцау! Бамин агъаз кæнæ!»
Паддзах нæуæгæй рарвиста хонгутæ æ паддзахдæбæл æма син загъта:
– Мæ кизги мин ка исдзæбæх кæна, уомæн устур хъазар лæвæрттæ ракæидзæнæн. Фегъосун кæнтæ æгасемæн дæр.
Цубур рæстæгмæ паддзахи галауанмæ алирдæгитæй цудæнцæ дæснитæ. Ка-еу бацæуидæ кизги уатмæ, е цубур рæстæгмæ æнкъардæй рацæуидæ æма æ сæр паддзахмæ бателидæ «нæ», зæгъгæ. Æнкъардæй – æнкъарддæр кодта паддзах. Байзадæй ма тæккæ зæронддæр дæсни – Хуринæ. Кизги уатмæ бахизтæй æма фæрсунтæ байдæдта уой. Балæдæрдтæй, кизги зæрди ци нез ниххизтæй æма ин ци хуасæ ес, уой дæр. Нæ ниллæудтæй Зæринæ æма радзурдта æ зæрди æнкъарæнтæ, æ сосæгдзийнæдтæ. Æнгъæл кæсуй паддзах, æнгъæл кæсунцæ адæм, Хуринæ ци хабар рахæсдзæй, уомæ. Уæдмæ дуар байгон æй æма рацудæй зæронд дæсни. Паддзахи рази æрлæугæй, сосæгкай бадзурдта æ гъоси:
– О, нæ цитгин, о, нæ номдзуд паддзах! Ма рафицæд дæ домбай реуи дæ маст æма нæмæ лæмбунæг байгъосæ... Дæ еунæг, дуйнети рæсугъддæр, дæ кизгæ æ кæдзос зæрдæй бауарзта нæ персайнаг уацайраг лæппо – Ариси.
Паддзах æ медбунат фесхъиудтæй, е 'рфгутæ ратартæ кодта æма нигъгъæр кодта Хуринæбæл;
– Куд бандиудтай, зæронд, мæ уорс дзигкотæй гириз кæнун?!
Уæдмæ æ тæвдæ æма маст исцудæнцæ æма бафарста зæронд дæсни –Хурини, ци кæнун гъæуй, уобæл. Хуринæ загъта;
– Ес еунæг хуасæ дæ кизги зæрди незæн. Æрбакæнун кæнæ дæ уацайраги æма æй фæууинун кæнæ дæ кизгæн. Æрмæст æрбахæссæд æ дала фæндур дæр. Уадзæ, е ба барохс кæна кизги зæрдæ æ рæсугъд зартæй.
Паддзах æ кизгæй фулдæр неке уарзта æма исарази æй зæронд уоси дзурдтæбæл. Æрбакодтонцæ фæсдзæуинттæ Ариси паддзахи цормæ. Арис æ уæргутæбæл æрхаудтæй, паддзахи рази æ сæр ниллæг æруадзгæй, æ къохæй федар хуæцгæй æ дала фæидурбæл. Паддзах æнкъардæй загъта:
– Мæ еунæг кизгæ нæ фæразуй æма дин барæ кæнун уой байгъæлдзæг кæнун! Зарæ дæ зартæ æд – æхсæвæ, æд – бонæ... Цалинмæ мæ кизгæ æ уатæй рахеза, уæдмæ. Мæ лæвар дин уодзæй сæребарæ! Арис сабургай фестадæй æма, барæ ракоргæй, бакъахдзæф кодта кизги уатмæ зæронд дæсний хæццæ, Мæнæ Заринæ, Ариси фæууингæй, цидæр десхузæй æ хуссæн уати рабадтæй æма æ хъурæй исервазтæй:
– Нана, нана ка æй? Ка æрбацудæй?
Зæронд уосæ æ медбилти бахудтæй æма сабургай рахизтæй кизги уатæй.
Кизги зæрдæ барохс æй лæхъуæни фæууиндмæ. Байгъæлдзæг æй кизги цæсгон, æ реуæй тахтæй уарзондзийнадæ Ариси реумæ. Нæуæгæй паддзахи кизгæн е 'ригон тог æ рæсугъд цæсгони рабадтæй, ростæ басурх æнцæ фæткъуй хузæн. Мæнæ уацайраг лæппо Арис кизги къæхтæмæ æхе багæлста. Дуйней рæсугъд æ медбунат фесхъиудтæй, æ цæститæ цубур рæстæгмæ æрæхгæдта, æ уорс фæлмæн къохтæ æруагъта. Лæхъуæн раба кодта кизги къохæн. Нигки хъæбæрдæр фестъæлфтæй паддзахи кизгæ. Байгом кодта æ рæсугъд сау цæститæ, фæлмæн æруагъта æ къохтæ Ариси усхъитæбæл 'ма æй æхемæ исивазта. Еци рæстæг етæ лæудтæнцæ хæстæг сæ кæрæдземæ, сæ зæрдити гупп-гупп игъустæй сæ реутæй, цума син ести рæсугъд фæндитæ зæгъунмæ гъавтонцæ, уоййау. Уæдмæ æригон лæхъуæни реуæй исервæзтæй арф уолæфт æма ниллæг хъурæй раидæдта дзорун æ уарзон Зæринæ – паддзахи кизгæн, – ци бон фæууидта уой, еци бонæй фæстæмæ æхецæн бунат ке нæбал еруй, фиццаг хатт æ царди æцæг уарзт æ реуи ке иссугъдæй æма ин æнæ паддзахи кизги уарзтæй нур цæрæн ке нæбал ес.
Нигъгъос æй Арис, уæдта бабæй ниллæг гъæлæсиуагæй бадзурдта кизгæмæ:
– Зæринæ, мæ царди нивæ! Уарзун дæ мæ цардæй фулдæр. Ду дæр уарзис мæн, уарзис?! Æнæ дæу уарзтæй, фæлтау мæлæт. Сау денгиз уодзæй мæ ингæнæ. О, Зæринæ! Рæсугъд Зæринæ! Дæ уарзтæй мæнæй амондгундæр нæ уодзæй а дуйнетæбæл.
– Уарзун дæ, мæ зæрдæмæ хъæбæр цæуис.,. Хуцау зæгъæд æма ду мæ зæрдæмæ куд цæуис, уотæ æз дæр дæ зæрдæмæ куд цæуон, – сабургай исервазтæй кизги хъурæй.
Дууæ уарзони кæрæдзей нихъхъури кодтонцæ. Фиццаг хатт арви рæсугъддæр, паддзахи кизгæ адгин ба ракодта уарзон лæхъуæнæн, æ кизгон æфсæрмидзийнадæ феронх кæнгæй. Еци сахат сæ дууæ дæр адтæнцæ амондгун æма игъæлдзæг. Фал уæдмæ ба Арис, кизгæмæ кæсгæй, нæлгоймаги цæстисугтæ æркалдта.
– Ду кæуис?! – исдзурдта Зæринæ æма æ æрбалхъивта Ариси.
– Ах, Зæринæ! Мæ зæрди фæндонæн, æвæдзи, исæнхæст уæн нæййес!
– Мæ уарзон лимæн, ма тухсæ! – загъта Зæринæ. – Мæ фиди размæ ракордзинан, цæмæй нин барæ радта нæ уарзондзийнадæ баеу кæнуимæ. Зонун æй æма мæнæй фулдæр неке уарзуй дуйнебæл æма нин фæттæрегъæд кæн дзæй.
– Нæ, Зæринæ! Ку базона дæ фидæ мах уарзт, уæд нин æй, æвæдзи, фехалдзæй. Фæлтау бал бангъæлмæ кæсæн. Кæд нин Хуцау банхус кæна, æма нæ бауадза нæ уарзондзийнадæ фехалун...
Еци дзурдти хæццæ лæхъуæн æримиста, æ хæццæ дала фæндур ке æрбахаста, æма æй æ тухгин къохтæмæ райста. Райгъустæй кизги уати цидæр дессаг, зæрдæмæцæугæ æнахур фæндури зæлтæ æма зар, кæцими адтæй уарзондзийнадæ, æнкъарддзийнадæ æма рæсугъд гъудитæ. Уомæ игъосгæй, Зæринæ – паддзахи кизгæ цийни уолæфт кодта, рохс кодта æ зæрдæ фур уарзтæй. Ку багъос æй зар, уæдта бафарста:
– Дæ ном, дæ ном мин нурма нæма загътай?
– Арис, Арис мæ худтонцæ мæ райгурæн бæсти.
– Куд рæсугъд æй дæ ном! – загъта Зæринæ.
Арис æ тухгин реумæ æрбалхъивта Зæрини æма загъта:
– Ду, ду мæн дæ, – æма рацудæй кизги аварæй, æ фæсте ба – паддзахи кизгæ.
Æ, цæститæ раздæрау цæхæр каллтонцæ, æрттивтонцæ стъалутау. Æ цæсгон нийирд æй хори тунау. Паддзахæн æ зæрдæ барохс æй æ кизгæмæ. Бакастæй лæхъуæнмæ æм ин загъта:
– Абонæй фæстæмæ дæуæн лæвæрд цæуй сæребарæ. Мæ адæмæн ци бартæ есг дæуæн дæр уони дæдтун. Кæд æма дæ зæрдæ дзоруй дæ райгурæн бæстæмæ, уæд дин цæуни барæ ес. Хуцау де 'уазæг æма дæ гъуддæгтæ дæхе фæндон уæнтæ...
Арис, æ сæрæй паддзахæн ниллæг раковгæй, райарфæ кодта æма сæрбæрзондæй галауанæй рацудæй. Цæй игъæлдзæг адтæй дуйне! Арвбæл хор æ медбилти худтæй æма æ фæлмæн гъар тунтæй тавта æрдзæ. Игъустæй аллихузон цъеути рæсугъд зарун. Деденгутæ игуæрдæнти фелаудтонцæ алирдигæй. Еци рæстæг Зæринæ æма Арисæй амондгундæр неке адтæй. «Цард, куд адгин æма уарзон дæ! Дæ уарзтæй куд берæ адæмти искæнис амондгун...»
* * *
Асдигор раздæрау адтæй игъæлдзæг. Æ кизги цийнæмæ гæсгæ, исфæндæ кодта устур нæртон кувд искæнун. Хонгутæ рарвиста бæсти алирдæмæти. Сауденгиз æма Хъирими хуæнхтæй устур Урусмæ, зундгонд Киевмæ, Астрахан æма Дони билтæмæ. Хунд æрцудæй кувдмæ Арис дæр.
Мæнæ алирдигæй цæунцæ алайнаг паддзахадæмæ иуазгутæ. Устур æрхи æгти фицунцæ нартон бæгæни. Æвгæрст цæуй косарти галтæ. Æфсинттæ фицунцæ артбæл, сæгъи æхсирæй конд цигъдæй дзигка, къамбеци æхсирæй конд цигъдæй ба – къеретæ. Зæнхæ тонуй фингити уæзæй. Æрæмбурд æнцæ алантæ – дигори фæсевæд æд тохæн – дзаумæуттæ æма æнгъæл кæсунцæ сæ арæхстдзийнадæ æма лæгдзийнадæ кæд равдесдзæнæнцæ иуазгути размæ.
Устур фæзи æртумбул æнцæ лæхъуæнтæ æма кизгуттæ, кафунцæ нæртон симд. Бæстæ бацæй еугур игъæлдзæг. Мийнасæ кæнунцæ адæм фингитæбæл. Рагон алайнаг – дигорон æгъдаумæ гæсгæ, гъæуама, финги æгъдау фæккæрон кæнгæй, сæ хъаурæ, лæгдзийнадæ æма тугъдон арæхстдзийнадæ равдистайуонцæ фæсевæди лæгдæртæ, иуазгути сæрæндæртæ. Æгъдаумæ гæсгæ гъæуама æвзурст æрцудайдæ силгоймæгти æхсæнæй сæ рæсугъддæр æма кадгиндæр, кæци еристи кæронмæ уæлахези кадæн бахастайдæ устур хъалацидзаг нæртон бæгæни еристæмæ фæууæлахезуæвæгæн. Æвзурст æрцудæй еристæмæ кæсæг тæрхони лæгтæ. Æвзарæн лæгтæ агурдтонцæ силгоймæгти хуæздæри. Уæдмæ æ адæмæй, иуазгутæй хатир ракоргæй, паддзах Асдигор радзурдта адæммее:
– О, хуарз адæм, нæ кадгин иуазгутæ! Абони уæнгæ беретæ фегъустонцæ мæ цийнæ, мæ царди нивæ, мæ уарзон кизгæ, мæ хъæболæ – Зæрини туххæй. Корун æма, нурмæ ка нæма фæууидта мæ кизги, етæ дæр æй фæууинæнтæ. Барæ радтетæ уомæн уæ размæ рацæун. Æрцудæй рæстæг æма хæстæгдæр базонетæ, мæ фæсте паддзахади сæргъи ка æрлæудзæй, адæми ихæстæ ка æнхæст кæндзæй, уой – мæ кизгæ Зæрини.
Адæм аразий тилд сæ сæртæ кодтонцæ.
Паддзах æ къохæй райамудта æма адæми размæ рацудæй Зæринæ. Ци дессаг саби исæнтæстæй паддзах Асдигорæн! Æ еу фæууиндæй бæстæ басабур æй. Адæми, иуазгути десæн ниггæнæнтæ нæбал адтæй. Сæ размæ лæудтæй дуйнети рæсугъддæр силгоймаг, паддзахи кизгæ – Зæринæ. Кизги бакаст берæ нæлгоймæггæн сæ меднимæр сæ зæрдитæ фехсилкъæ кодта. Райгъустæй алирдигæй цийни гъæртæ:
– Кадæ æма намус Зæрини рæсугъдæн! Æгас цæуæд паддзах Асдигор!
Финги хестæртæ, паддзахи кизги туххæй раковгæй, раревæд кодтонцæ сæ бæгæний хъалацтæ кизги цæрæнбони туххæй, кувдбæл баниуазтонцæ сæ бæгæний къостæ иннæ адæм, иуазгутæ дæр. Адæм нæуæгæй базмалдæнцæ. Цъухæй–цъухмæ адæм кæрæдземæн кодтонцæ паддзахи кизги кой. Зæринæ син æ рæсугъддзинадæй се 'уæнгти бауагъта цидæр тухæ æма амонд. Еугурæй дæр адтæнцæ игъæлдзæг.
«Дессаг, цума цæбæл гъуди кодта еци рæстæг нæ дуйней хуæздæр, бæсти рæсугъддæр ба?» Сосæгкай æ рæсугъд цæститæй агурдта адæми æхсæн Ариси. Адæм уотæ берæ адтæй кувди фæзи æма цæститæн сæ бон нæ адтæй уони æхсæн уарзони иссерун. Фал дзæгъæли агурдта паддзахи кизгæ æ зæрди фæндон, æ уарзон Ариси. Ку нæй иссердта, уæдта Зæринæ фæстæмæ бацудæй паддзахи галауанмæ. Уомæ адтæй сосæг фæндитæ æ фидæй, адæмæй. Исфæндæ кодта æгасей дæр деси бафтаун, (Гъуди кæнетæ, мæ тауæрæхъæн æ райдайæни ку финстон; «Зæринæ берæ уарзта æ фиди тауæрæхътæмæ игъосун, уæлдайдæр ба – тугъдон хабæрттæмæ». Кизгæн, æ минкъиййæй – æ устурмæ, еци хабæрттæ лæвардтонцæ цидæр нифс æма хъаурæ. Арæх-еу æ фиди фæсдзæуинттæн балигъзтæ кæнидæ æма ин етæ амудтонцæ паддзахи сосæггæй тугъдон дæснидзийнæдтæ – церхъæй хуæцунмæ, саздахъæй æхсунмæ æма бæхбæл бадунмæ. Лæдæрдтæй Зæринæ, æ фидæ æносмæ ке нæ цæрдзæй, ескæци замани паддзахади сæргъи уомæн æрлæугæ уодзæй æма æхе цæттæ кодта.)
Кизгæн е 'уæнгти æ фиди тог цудæй. Хуцау ин æ рæсугъддзинади Хæццæ балæвар кодта, кæд æма силгоймаг адтæй, уæддæр устур нифс, хъаурæ æма зунд. Мæнæ нур æрцудæй еци рæстæг æма Зæринæ еристи равдеса æ лæгдзийнæдтæ нæлгоймæгти нихмæ. Æ уæле искодта æфсæддони уæледарæс. Æ реу бахгæдта æндон æфсæйнаг æхгæнæнæй, æ сæрбæл ба æркодта згъæр тахъа ходæ, кæций буни баримахста æ даргъ дзигкотæ. Æ нарæг астæубæл бабаста гали царæй конд фæтæн ронæ, кæцибæл ауигъд адтæй даргъ, нарæг, рæуæг церхъ; æ фæсонтæбæл ба– саздахъ æд фæттæдонæ. Æ рæсугъд цæсгон дæр æхгæд адтæй дæлæмæ æруадзгæ æфсæйнаг федар æхгæнæнæй. Лæмбунæг бакæсгæй дæр неке базудтайдæ, æ размæ нæлгоймаг, æви силгоймаг лæууй, уой.
Æнцад нæ бадтæй еци сахат Арис дæр. Æрцудæй, рагæй кæмæ æнгъæл кастæй, еци рæстæг... Нур ин лæгдзийнадæ, æ хъаурæ, еристи нихмæ лæугутæбæл бавдесунмæ хуарз равгæ фæцæй. Паддзахæн æ бæгъатæрдзийнадæ бавдесун, æ кизгæ Зæринæн ба æхе хъæбæрдæр бауарзун кæнун. Гъуди кодта Арис: «Кæд мæ къохи бафтуйа еристи фæууæлахез ун, уæд паддзахæй ракордзæнæн æ кизги къох».
Æхебæл кодта тугъдон уæледарæс.
Кувд кæронмæ цудæй. Байзадæй ма адæмæн, иуазгутæн тугъдон еристæмæ бакæсун, тæрхони лæгтæн ба тухгиндæри равзарун æма ин, паддзахи кизги къохтæй, бæгæний хъалац радтун уæлахези туххæй.
Райгъустæй сикъати уасун. Устур фæзæ цæттæ адтæй еристæмæ. Фæзи астæумæ еутай-дугайтæй цудæнцæ еристи архайгутæ. Сæ хъал бæхтæ сæ буни дзоргъа кодтонцæ, æфсæйнаг æхгæнæнтæй сæ уæледарæс зингæ дæр нæ кодта. Æфсæйнаг æхгæнæнæй æмбæрзт адтæнцæ сæ къæхти фæттасæнтæ, уæрагисæртæ. Хормæ син æрттивтитæ калдтонцæ алирдæмæти. Ериси архайгутæ сæ сæртæй ниллæг раковиуонцæ паддзахæн, иуазгутæн, адæмæн. Райгъустæй сикъати уасун æма фæзæ раревæд æй.
Тæрхони лæгтæ хæлттæ исгæлстонцæ. Баеудагъ æй ерис. Сæ тухæ æвзурстонцæ æнкъайгай. Ка фæууæлахез уидæ, уони бабæй фембæлун кæниуонцæ сæ кæрæдзей хæццæ, уотемæй ма си фæстагмæ дууæ тугъдони æризадæй. Карз еристи уæлахездзау не 'сбæрæг æй æма исигъустæй адæми цийни гъæртæ:
– Кадæ, кадæ сæ дууемæн дæр! Сæ дууæ дæр разиндтæнцæ æмхъаурæ, æмтухæ! Бæгæний хъалац сæ дууемæндæр!
Тæрхони лæгтæ дæр арази адтæнцæ уобæл. Фестадæй æ бунатæй паддзах æма адæм басабур æнцæ. Уæрæх ракастæй адæмбæл æма гъæрæй загъта:
– О, мæ кадгин адæм, иуазгутæ! Уæхуæдтæ фæууидтайтæ сæ арæхстдзийнадæ, лæгдзийнадæ, сæ хъаурæ æма нифс куд бавдистонцæ ме 'фсæддонтæ ериси архайди. Куд дессаг адтæй сæ тугъдон дæснидзийнадæ дæр. О, Хуцау, табу дæхецæн æма ма мæ еу минкъий бауадзæ цæрун мæ адæмихæццæ, ма мин рахгæнæ рагацау мæ цæститæ! Кадæ мæ кадгин, цитгин æфсæддонтæн, кæцитæ еристи нæ хæлар иуазгути рази бавдистонцæ сæ сæрæндзийнæдтæ! Кæцитæ сæ арæхстдзийнадæй искодтонцæ кадæ мæнæн, нæ дигорæ-аланти паддзахадæн. – Мæ кизгæ! Рахæссæ бæгæний хъалац тухгиндæрти тухгиндæртæн! Еци кадæ æма аргъ искодтонцæ сæхецæн еристи, уæлахези архайдæй.
Адæм сæхе разилдтонцæ галауани æрдæмæ æма æнгъæл кастæнцæ паддзахи кизгæ Зæринæмæ. Бæлдтæнцæ нæуæгæй бæсти рæсугъддæри фæууинунмæ. Кизгæ нæ зиндтæй æма паддзах нæуæгæй барвиста. Цубур рæстæгмæ ин фегъосун кодтонцæ: «Кизгæ галауанти некæми æй!»
Паддзахи зæрди цидæр тас бацудæй. Æнгъæл кæсунцæ еугурæй дæр, кæд фæззиндзæнæй сæ размæ хори тунау Зæринæ – паддзахи кизгæ. Лæуунцæ дууæ æфсæддони дæр æма хезунцæ сæ уæлахези бæгæний хъалац. Уæдмæ паддзах загъта:
– Равдесетæ адæммæ, нæ иуазгутæмæ уæ цæсгонтæ, исесетæ уæ тахъа, æзгъæр ходтæ уæ сæртæй.
Паддзахи загъд фиццагидæр исæнхæст кодта æфсæддонтæй еу. Куддæр æ цæсгон байгон кодта æма æ ходæ исиста, уотæ адæм базудтонцæ персайнаг уацайраг Ариси æма дести бацудæнцæ. Никки десдæр ба кодта паддзах Асдигор. Уацари раесуни бонæй фæстæмæ дзæгъæли нæ фæццудæй аци лæппо æ зæрдæмæ. Боз адтæй æхецæй Асдигор, æ уæззау зунд ке нæ фæссайдта, лæхъуæни базонунмæ. Паддзах Ариси усхъæ æ уæззау тухгии къохæй рæуæг æрцавта æма аразий, цийни худт медбилти бакодта.
Еци сахат Арис адтæй æхецæй сæрбæрзонд, Зудта, Зæрини къохтæй бæгæний хъалац райсгæй, хъæбæр æхцæуæн ке уодзæй уомæн. Адтæй ин æхцæуæн паддзахи медбилти худт дæр, «Æрцудæй, æрцудæй мæ рæстæг æма нур ба раргом кæндаæн мæ уарзти сосæгдзийнадæ паддзахæн», – гъуди кодта Арис.
«Кæми адтæй еци рæстæг паддзахи кизгæ – Зæринæ? Ци куста? Цæмæннæ балæвардта æ рæсугъд къохтæй бæгæний хъалац æ цæргæс, æ уарзти нивæн?»
Цалиимæ паддзах арфитæ кодта еристи архайгутæн, уæдмæ æ цæсгон нур ма æхгæд кæмæн адтæй, æ ходæ ка нæма исиста, еци æфсæддон цурд февналдта æма æрбаиста ериси тæрхони лæгги разæй бæгæний хъалац. Бацудæй паддзах Ариси цормæ, æма балæвардта Арисмæ хъалац. Арис æ тухгин уæззау къохтæ æрæвардта æ реубæл æма æнцад кæсуй. Лæуунцæ раздæри дууæ «нихмæлæууæги» сæ кæрæдзей размæ сæ еуей къохти бæгæний хъалац, уотемæй. Æрæгиау Ариси хъурæй исервазтæй:
– Æз æрмæстдæр аци бæгæний хъалац райсдзæнæн паддзахи кизгæ –Зæрини къохтæй, ниуазгæ ба æй бакæндзинан мæ нихмæлæууæги хæццæ еумæ.
Еци дзурдтæмæ æфсæддон хъалац æрæвардта фингæбæл æма исиста æ ходæ цæсгонæмбæрзæни хæццæ. Дуйне ниййирд æй. Разиндтæй паддзахи кизгæ – Зæрини цæсгон. Фæсонтæбæл æркалдæнцæ дæргъæй-дæргъæмæ сау дзигкотæ. Цæхæртæ каддтонцæ æ дууæ цæсти. Адæм еугурæй дæр сæ фур десæй цавддортау лæудтæнцæ. Еугуремæн дæр еци рæстæг адтæй фуни хузæн. Фур десæй мардæй Арис дæр, æ цæсгонæй æ фæлладхуз фесавдæй. Дес кодта паддзах дæр, æ медбунат æрбадгæй, æхебæл дæр нæбал æууæндтæй: «Мæ размæ мæ кизгæ æй, æви мæ сайтани хай?».
Фиццагидæр æхе æрлæдæрдтæй Киеви къняз. Мæнæ æ рази лæудтæй, минкъий раздæр еристи уобæл ка фæууæлахез æй, ейæ, паддзахи кизгæ. Къняз ин æ уæрагæй ниллæг ракувта æ сæрæндзийнадæ, æ лæгдзийнадæ æма рæсугъддзийнади туххæй, уæдта паддзахмæ исдзурдта:
– О, зундгин, тухгин æма домбай паддзах! Дæ кизгæ æрхаста дæуæн устур кадæ! Фæззилдтæн, фæххаттæн дуйнетæбæл, фал ауæхæн дессаг ба мæ царди дæр некæд фæууидтон! Кизгæ уæхæн дессаг тугъдон лæгдзийнæдтæ æма зонундзийнæдтæ равдеса?! Æ рæсугъддзийнадæ ба?! Нæ фæууидтон некæци бæсти уæхæн рæсугъд силгоймаг дæр... Æвæдзи, дуйнетæбæл нæ разиндзæй уæхæн сахъ игурд æма дæ кизги фарсмæ æрбалæууа уарзон æма цардæмбалæн. О, Хуцау, ке нивæ, ке амонди хай уодзæй дæ кизгæ?!
Уæдмæ Зæринæ – паддзахи кизгæ райста бæгæний хъалац æма æй бæрзонд исиста, фæлмæн лæвæрд æй бакодта Арисмæ. Арис лæууй цавддорау.
– Æндæр гъудитæ дæмæ фæззиндтæй, æви мин мæ къохтæй мæ ниуазæн нæ есис? – загъта кизгæ æма, медбилти ходгæй бакастæй лæхъуæни цæститæмæ. Фестьæлфтæй Арис æма æваст исдзурдта:
– Нæ, нæ! Æз дæ къохæй марг дæр баниуаздзæнæн, – уæдта бакастæй æфсæрмийæй паддзахмæ æма искувта:
– Хуарз адæм, ниуазун æй паддзахи кизгæ Зæрини сæрæндзийнадæ, нæ кæдзос уарзт æма амонди туххæй!
Адæм балæдæрдтæнцæ гъуддаг æма райхъустæй сæ цийни гъæр:
– О, нæ паддзах! Сæ дууæ дæр кæрæдземæн аккаг æнцæ æма син баеу кæнæ сæ уарзондзийнадæ, сæ амонд!
Паддзах нур дæр æхемæ нæма æрцудæй æма цидæр æнахур деси кæститæ кодта, æ алфамбулай ци цудæй, уомæ. Уæдмæ ин æ рагон лимæн, Киеви къняз æ усхъæбæл æ къох æрæвардта æма загъта:
– Æз де 'уазæг, дæ барæ. Кæд естæмæй рæдуйун, уæд корун уе 'гасемæй дæр устур хатир, фал цитгин æма кадгин паддзах! Мæнæ дæ размæ лæуунцæ дууæ æригон сабий, сæ дууæ дæр æнцæ сæ кæрæдзей аккаг. Фæттæрегъæд кæнæ дæ федар зæрдæй дæ еунæг бæдолæн, дæ уарзон кизгæн æма ин барæ радта амонди къах искæнунмæ.
Фестадæй паддзах. Лæуунцæ æ размæ æ кизгæ æма уарзон лæхъуæн. Алирдигæй игъустæй гъæр:
– Амонд сæ дууемæн дæр! Æгас цæуæд сæуарзондзийнадæ! Зæринæ фендиуддæр æй æма, Ариси къохбæл ниххуæцгæй, загъта æ фидæн:
– Мæнæ, мæнæ, мæхецæн ке равзурстон цардæмбалæн, е...
Зæронд паддзах æ хъури æрбакодта дууæ уарзоней æма загъта:
– Е мæ кизгæ, а ба уодзæй мæ сиахс. О, Хуцау! Радтæ мин мæлæт æрмæстдæр сумах хъурибуни!
Адæм нæуæгæй исбадтæнцæ фингитæбæл æма кодтонцæ мийнасæ. Кувд кувди фæдбæл цудæй паддзахи кизгæ Зæринæ æма æ уарзон æмбал Ариси туххæй.
Цæйбæрцæ цæститæ кастæй сæ дууемæ дæр! Ци берæ адæм хицæ кодта уонæмæ, уонæн сæ амонд æма уарзондзийнадæмæ!
Æвæдзи, зæгъетæ, æма паддзахи фæндонæй Арис æма Зæринæ сæ цард баеумæ кодтонцæ æма нивæй сæ зæруæмæ уарзон цард фæккодтонцæ?
* * *
Фал уотæ нæ адтæй...
Райдайæни æз финстон – алайнаг паддзахадæмæ тæтæр-манголи минæвæрттæ куд æрбацудæнцæ, куд син загъта паддзах Асдигор. Фал мангойлаг хан лимæн кæнуни зæрди нæ адтæй алайнаг паддзахи хæццæ. Ханæн е 'рвист лæгтæ ку фегъосун кодтонцæ æма, дан, аланти паддзахадæ гъæздугæй «тъæпп хауй», сæ зæнхитæ, сæ фонси æргъæуттæн ниггæнæнтæ нæбал ес, уæд исфæндæ кодта æфсæдтæ бамбурд кæнун æма аланти паддзахи нихмæ истохун. Дууæ уарзоней туххæн рæсугъд хабæрттæ цалинмæ цудæнцæ, уæдмæ тæтæр-мангойлаг хан æхе цæттæ кодта устур тогкалæн тохмæ. Алайнаг паддзахадæмæ искодта æ балц. Тæтæр-манголи æфсæдтæ адтæнцæ тухуаст берæ, нимæдзæй цаддæр хатти фулдæр адтæнцæ аланти æфсæдтæй. Аланти æфсæдтæ ба тухæ, хъаурæ, тугъдон дæснидзийнадæй тæтæр-манголи æфсæдтæй – тухгиндæр.
Мæнæ паддзах Асдигорбæл арæхæй-арæхдæр æмбæлун байдæдта хабæрттæ, æ арæнтæ, æ зæнхитæмæ æзнаг ке 'рбахæстæг æй: «Хорискæсæн æрдигæй цæунцæ хани æфсæдтæ. Кæрон æма син нимæдзæ дæр нæййес. Бу – дуртæ сæ къæхти буни ниццæнцæ. Хæстæгæй – хæстæгдæр кæнунцæ».
Аланти паддзахади арæнмæ ку бацудæнцæ, уæдта хан барвиста алайнаг паддзахмæ, цæмæй е е 'фсæдти хæццæ æхе уацари радта æнæ истохгæй, æ паддзахади мулкитæ ба балæвар кæна ханæн. Райгъустæй дигорæ-алантæбæл фæдеси гъæр. Паддзах æрæмбурд кодта æ тутъдон уæлдæр лæгтæ æма син фегъосун кодта хани фæндон.
– Нæ! Нæ! Уацари бæсти – мæлæт. Цалинмæ ма ни еунæгемæн дæр æ тог æ бауæри уа, уæдмæ уодзæй нæ тох хани нихмæ! Не 'рбауадздзинан нæ фиддæлти зæнхæмæ знаги. Тох, тох ханæн! – исигъустæй алайнæгти гъæртæ.
– Æз уи алкæддæр адтæн сæрбон æма арфиаг. Зонун æма райгурæн бæсти сæрвæлтау сумахæй æ цардбæл ке неке байауæрддзæй. Нифсгун æма бæгъатæрæй ке бавдесдзинайтæ тугъди будури уæхе... Арфæ уин кæнуи мæ зæронд уорс сæрæй, – загъта Асдигор æма бабарæ кодта æ уæлдæр тугъдон лæггæн, цæмæй етæ æфсæдтæ цубур рæстæгмæ бацæттæ кæнонцæ.
Цубур рæстæгмæ кæрæдзей нихмæ лæудтæй дууæ тухи, паддзах Асдигор æма хани æфсæдтæ. Зудта, уæдта игъус тгонд адтæй ханæн, алантæ тухгин æма дæсни тохæг ке æнцæ æма æ къохи æнцонтæй уæлахез нæ бафтуйдзæй. Уомæ гæсгæ ба уæлдай хъæбæрдæр бацæттæ кодта е 'фсæдтæ. Æ сæйраг, хуæздæр æфсадæн æ сæргъи ниввардта æ фурти сæргълæууæгæй.
Рагæй дæр, æ нифс æма уæззау зунди фæрци, алайнаг паддзах нимад адтæй кадгин æма дæсни тугъдон сæргълæууæгбæл. Раздæри тутъдтити уой æ зунд некæд фæссайдта æма, еу гæнæн æма амал кæми нæбал уидæ, уæхæн рауæнтæй дæр уæлахезæй рацæуидæ е 'фсæдти хæццæ.
Мæнæ нур дæр, æ паддзахади сæрмæ сау мегътæ ку æрæмбурд æнцæ, уæд арф гъудити рандæй. Исфæндæ кодта зæронд лæгтæ æма уоститæ, сувæллæнтти знагæй багъæуай кæнун. Зудта, тох мæлæти уæнгæ карз ке уодзæй æма гъæуама багъæуай кæна алантæ-дигори бундор, ма бауадза уой хъаурæ исæскъунун. Рарвиста, тохунгъон ка нæ адтæй, еци адаæм идард хонхи коммæ æма сæ уоми арф лæгæтти баримæхсун кодта.
Сæйраг æфсæдти хæццæ ма байзадæй силгоймæгти тохæг æфсад. Алайнаг силгоймæгтæ карз тохи сæ нæлгоймæгтæй дæлдæр некæд адтæнцæ ма уомæ гæсгæ паддзахи цæсти уæлиау æвард адтæнцæ. Мæнæ нур дæр тæтæр-манголи æфсади æсгаргути нихмæ фиццаг цæф етæ райстайуонцæ. Етæ сæ саздæхъти фæттæй гъæуама бауорæдтайуонцæ нихмæ æмпурсгути. Сæ сæргъи æвæрд æрцудæй паддзахи кизгæ – Зæринæ, кæци еци кадæ бакуста æ уæззау зунд æма тугъдон арæхстдзийнæдти фæрци. Кæд æма паддзах æ еунæг кизгæн тарстæй, уæддæр æй райгурæн бæстæй зинаргъдæр æма уæлдæр не 'скодта, Зудта паддзах, æма, ци карз тох уодзæй, уордигæй ес дууæ фæндаги: кенæ мæлæт, кенæ ба уæлахез æма сæребарæдзийнадæ.
Зин сахат нæ байзадæй еуварс æ кизги уарзон, е 'ригон сиахс, Арис дæр. Уомæн ба бабарæ кодта бæхгин æфсæдтæй еуей. Арис сæумæй-изæрмæ, æхсæвазй-бонмæ разел-базел кодта е' фсадбæл æма бæрæг кодта – куд рæвдзæ æнцæ æфсæддонтæ тохмæ. Мæнæ нур, аци уæззау рæстæги аланти паддзахадæ уомæн æ дуккаг райгурæн бæсти хузæн ке æй, уой лæдæргæй, цæттæ адтæй æ уод нæ бавгъау кæнунмæ дæр уæлахези туххæй.
Хан исфæндæ кодта тугъдон мæнгарддзийнадæ равдесун æма размæ ракодта еу æфсад, æ сæргъи ба ин ниввардта æ фурти. Еци æфсад гъæуама басгарстайдæ, алантæ куд цæттæ æнцæ тохмæ, уой, Хани фæндæ адтæй æхе цæститæй фæууинун, куд тохунцæ æ нихмæлæугутæ. Паддзах Асдигор балæдæрдтæй хани мæнгард гъудитæ æма е 'фсæдтæ раеуварс кодта арæнæй, размæ ба ракодта саздахъæй æхсгути, силгоймæгти æфсад, сæ сæргъи Зæринæ – паддзахи кизгæ. Цæттæ адтæнцæ дууæ æфсади дæр истохунмæ.
Арв цъæхтæ кæнун ку райдæдта, уотæ тæтæр-мангойлаг æфсæдти æрдигæй райгъустæй барабанти гæбар-губур, райгъустæй сикъати уасун дæр, аланти æфсæдтæ кæми лæудтæнцæ, уордигæй. Бацайдагъ æй тох.
Зæринæ е 'фсади минкъийдæр æмбес дони билæбæл æрæвардта, иннетæ ба æндæр рауæн римæхст адтæнцæ Тæтæр-манголи æфсад уоци еу æмпурст ракодта размæ. Сæ къæхти ругæй арв нæбал зиндтæй, идардмæ игъустæй сæ бæхти хуррутт æма тохæндзаумау æфсæйнæгути зæлланг. Зæринæ лæмбунæг кастæй æма хизта, хæстæгдæр кæд æрбацæудзæнæнцæ знæгтæ. Хани æфсад дони иннæ фарс ку фæцæй, уæд сæбæл саздахъæй æхсгутæ æскъоттгæнгæ рауагътонцæ сæ фæттæ æма си беретæ æрæгъзалдæнцæ мæрдтæй донмæ. Æфсади сæргълæууæг – хани фуртæн æ маст æ медæг рафунх æй æма, æ гъæлæсидзаг ниффæдес кæнгæй, «алла, алла», зæгъгæ, уоци еу æмпурст бакодта.
Куддæр тæтæр-манголи æфсад дони астæу фæцæй, уотæ паддзахи кизгæ, е 'фсади устурдæр тухæ римæхст кæми адтæй, уордигæй цурд размæ ракодта. Ех уарæгау, саздахъи фæттæ никкалдæнцæ дони астæумæ. Бæстæ сæ гъæрæй æскъот фестадæй. Бæргæ æрвиста хани фурт е фсæддонти размæ, фал сæ барæ нæбал адтæй. Еугаййæй калдæнцæ мæрдтæй. Сæ тогæй дон еугурæй дæр сурх-сурхид хузæ райста.
Уæдмæ ледзун байдæдтонцæ, кæд æма сæ размæ цæун кодта хани фурт, уæддæр. Бæргæ фæдесгъæр кодта æ гъæлæсидзаг, фал æй игъосгæ дæр некебал кодта. Уæдмæ æхуæдæг дæр ледзæги фæцæй, рæуæг цæф фæууогæй.
Еци нивæмæ фæйнæ бæрзонд тегъемæй кастæнцæ паддзах Асдигор æма хан. Кæд æма Асдигорæн æ зæрдæ цийни гъæр кодта е 'ндон реуи, уæд ханæн ба æ реуæй исхаунмæ гъавта æ фур мæстæй. Фиццаг уæлахез бал æрхаста аланти æфсæдтæн паддзахи кизгæ Зæринæ е 'фсади хæццæ.
«Уæлахез!» Уæлахез!» – игъустæй цийни гъæртæ, Фæйнердæмæ фелаудтонцæ турусатæ алайнаг æфсæддонти къохти. Гъе, æрмæст еунæг гъæр дæр нæ игъустæй тæтæр-манголи æфсæдти æрдигæй.
Хани уодмæ еу минкъий тас бацудæй, фунхтæй æ маст. Нигки ба ма ку балæдæрдтæй, æма ин æ фурти æфсад алайнаг силгоймæгти æфсад æрдæрæн кодта, уæд æхецæн бунат нæбал ирдта фур тингунæй. Цалдæр бони æхемæ не 'рцудæй хан. Гъеуæхæн зæрди нез искодта паддзахи кизгæ уомæн. Цубур рæстæгмæ тох ниссабур æй. Дууæ æфсади дæр хизтонцæ сæйраг тохи бон.
Æрмæст-еу еци цубур рæстæг, паддзахи унаффæмæ гæсгæ, е 'фсæддонтæ минкъий къуæрттæй æхсæвигон бацæуиуонцæ, знаг кæми æрбунат кодта, уордæмæ æма сæ сабургай мардтонцæ, ихалдтонцæ син сæ тугъдон æгъдау.
Паддзах барвиста Ариси æ бæхгин æфсади хæццæ знаги къилдунмæ æма, сæхе æрримæхсгæй, æнгъæлмæ кастæнцæ, сæйраг æфсæдти сæргъи ба æхуæдæг æрлæудтæй. Еци рæстæг Арис æма Зæринæ сæ меднимæр гъуди кодтонцæ сæ кæрæдзебæл. Кизгæ еу исковидæ Хуцаумæ:
– Ма мæ ниууадзæ седзæрæй! Багъæуай кæнæ мæлæтæй нæ адæми, радтæ нин сæребарæ æма уæлахез!»
Кувта Арис дæр:
– Корун æма нин нæ уарзондзийнадæ ма фехалæ, нæ адгин цард... Табу дæуæн! О, устур Хуцау! Радтæ нин уæлахез!
Хор цуппар хатти ку искастæй æма цуппар хатти ку ранигулдæй, уой фæсте райдæдта сæйраг тох. Æфсæдтæ лæуунцæ кæрæдзей нихмæ. Тугъдон æгъдаумæ гæсгæ, фиццаг барæ адтæй дууæ богалей кæрæдзей нихмæ исхуæцун.
Паддзах размæ ракодта æ богали, размæ рацудæй хани богал дæр. Паддзахмæ адтæй сосæг, мæнгард фæндæ æма æ сосæгдзийнадæ баримахста е 'фсаэддонтæй дæр. Æрмæстдæр æй зудтонцæ æ кизгæ Зæрини хæццæ, кæци гъæуама истугътайдæ хани богали хæццæ. Кæд æма фæууæлахез адтайдæ, уæд е равардтайдæ устур нифс аланти æфсæдтæн тохи, ходуйнаг æма тас, æгадæ æма хæлхъойдзийнадæ ба хани æфсæдтæн.
Лæуунцæ дæргъæй-дæргъæмæ æфсæдтæ сæ кæрæдзей нихмæ. Еуетæ сæ цард дæр нæ бавгъау кæндзæнцæ райгурæн бæстæ багъæуай кæнунбæл, иннетæ ба есге зæнхитæ, есге мулкитæ бастъегъунбæл.
Фиццаг æ къох бæрзонд исиста алайнаг шддзах – Асдигор æма æ богал тугъдон лæуд искодта, æ нихмæлæууæгмæ æнгъæл кæсгæй, дуккаг ба – хан, æма уомæн дæр æ богал цæтгæ адтæй. Сæ дууемæн дæр сæ бæхтæ сæ буни гъазтонцæ, сæ фийтæй игъустæй сæ хуррутт. Кæсунцæ сæ кæрæдземæ дууæ богали, сæ къохти – сæ рæхуайæнтæ, сæ астæубæттæн рæнттæбæл сæ даргъ церхъитæ ауигъд, сæ сæртæбæл се 'згъæр ходтæ, сæ цæсгæнттæ æфсæйнаг æхгæнæнтæй æхгæд, уотемæй. Дууердигæй дæр райгъустæй сикъати уаст æма барабанти гъæр.
«Размæ! Размæ!» – игъустæй гъæр, фатау рауагътонцæ догъи сæ бæхтæ сæ кæрæдзей нихмæ дууæ богали. Бæхгинтæ, дууæ богали кинау зилдæнцæ, сæ кæрæдземæн агъазиау цæфтæ кæнгæй. Сæ циргъ арцитæ басастæнцæ. Æндон æфсæйнæг уарттæ церхъити цæфтæй цæхæртæ калдтонцæ, цудæй сæ зæлланг гъæр. Ку – еу хъæбæрдæр кодта иннебæл, ку ба – иннæ, уотемæй цудæй тох. Уæдмæ сæ дууæ дæр фæллайун байдæдтонцæ.
Хуцау, адæймагæн уодигъæдæ радтгæй, балæвар кодта силгоймагæн бухсондзийнадæ æма уой фæрци алайнаг богал архайдта минкъий рæвдзæдæр æма цурддæр. Еу уæхæни фæрраздæр æй алайнаг богал æ цæф никкæнунмæ æма баргъавта церхъи цæфæй мангойлаг богали сæр. Бæхæй еуварс фесхъиудтæй, фæттахтæй æ сæрæй æ тахъа ходæ дæр. Байгон æй æ сæр, цæсгон.
Хорæй сугъд цæсгонбæл тарсти каст кодтонцæ хани богали дууæ цъундæ цæсти. Æруагъта æнкъардæй æ сæр. Байзадæй састи бунати. Алайнаг æфсæдти æрдигæй райгъустæй нæуæгæй цийни гъæртæ.
Паддзах Асдигори богал сæрбæрзондæй бадуй æ бæхи уæле æма кæсуй паддзахи æрдæмæ. Уæдмæ рæуæг фелваста æ ходæ æма цæсгонæмбæрзæн, æма æ дзигкотæ æркалдæнцæ æ бауæрбæл. Еугурæй дæр фæууидтонцæ силгоймаги рæсугъд цæсгон. Хан, æ богалбæл ка фæууæлахез æй, уой ку фæууидта, уæд æ цъундæ цæститæ фур десæй нидздзангъир æнцæ, ниххæлеу æй æ гъæлæс. Дуйнетæбæл æ богалæн тухгæнæг тухæ нæ ирдта, нур ба ибæл силгоймаг фæууæлахез æй.
– Аци тугъдон адæмæн сæ силгоймæгтæ уотæ тухгин æма дæсни тохæг кæми æнцæ, уоми уæд сæ нæлгоймæгтæ ба куд æнцæ? – гъуди кодта хан, гъуди кодтонцæ е 'фсæддонтæ дæр.
Устур тас бацудæй сæ уодти. Цалинмæ сæ хæлхъой æма деси адтæнцæ тæтæр-мангойлæгтæ, уæдмæ Зæринæ æ фидæ Асдигори загъд нæ бахезгæй, æ къохи æ церхъ бæрзонд исесгаэй, нигъгъæр кодта:
– Мæлæт! Мæлæт хани тогцъиртæн!
Æ фидæ – Асдигори фарсмæ æрбалæугæй, æфсæдти разæй сæхе ниццавтонцæ хани æфсæддонтæбæл. Сæ фæсте алайнаг æфсæдтæ дæрæн кодтонцæ се 'знæгти. Куд цурд, арæхстгинæй, куд рæвдзæ архайдтонцæ тохи паддзахи æфсæддонтæ, уомæн адтæй æвдесæн устур Хуцау, арви изæдтæ.
Хани æфсæдтæ фæстæмæ ледзунмæ фæцæнцæ, фал сæ уоми хизта Арис е фсади хæццæ æма син тухуаст тухгин цæфтæ кодта. Хан ку балæдæрдтæй æ гъуддаг, уæлахез ин ке нæ бантæсдзæнæй æ къохмæ райсун, уæд исфæндæ кодта, – ци æфсæдтæ ма имæ байзадазй, уони фæййервæзун кæнун æма исесун кодта уорс турусатæ. Алантæ уацари райстонцæ хан æма е 'фсæдти.
Паддзахи бардзурдмæ гæсгæ гъæуама алкедæр æ мæрдтæ бафснайдтайдæ. Цуппар боней дæргъци сæ дууетæ дæр сæ мæрдтæ зæнхи барæ бакодтонцæ. Алантæ сæ зиæнттæ кæми банигæдтонцæ, еци обау туппуртæ адтæнцæ дууæ, тæтæр-манголæн ба дууинсæй.
Нур ба гъæуама хан æрлæудтайдæ æ уæргутæбæл алайнаг паддзахи размæ æма ракурдтайдæ хатир. Лæуунцæ тæтæр-манголи тугъдон уæлдæр лæгтæ хани хæццæ паддзах Асдигори цори сæ уæргутæбæл. Корунцæ паддзахæй хатир æма сæ цæмæй рауадза се 'фсæдти хæццæ сæ бæстæмæ.
– Æз дæмæ, кæддæр ци минæвæрттæ æрбарвистай мæ паддзахадæмæ, уонæй рафæдзахстон: кæд æма дæ хæларæй цæрун фæндуй мæ адæми хæццæ æма нæмæ зæрдæй дæдтис дæ лимæни къох, уæд дæмæ мах ба – нæ дууæ къохи. Кæд æма нæ, уæдта дин Хуцау истæрхон кæнæд, зæгъгæ.
– Ду мæнгард æма хинæйдзаг разиндтæ, фæссайдтай дæ дзурд æма æрбакодтай мæ паддзахади арæнтæмæ дæ тогцъир æфсæдтæ. Уомæй ци рауадæй, уой фæууидтайтæ... Зонетæ, мах не 'знæгтæ дæр ке нимайæн, уой, æма уин сæребарæ дæдтун. Æрмæст фегъосун кæнтæ иннæ тохæг адæмтæн дæр, алайнаг паддзахадæ тухгин ке æй, – загъта паддзах Асдигор.
Хан æма æ фæсдзæуинттæн сæ уолæфт дæр нæбал цæуй. Еци сæргубурæй сæ уæргутæбæл лæуунцæ. Æрæгиау хан æ цъундæ цæститæй сагъæсхузæй искастæй паддзахмæ æма сабургай загъта:
– О, паддзахти паддзахдæр! Уæллаг – æвдесæн... æз сæттун мæ устур рæдудбæл. Фæххаттæн алли бæстити æма алкæми дæр кувтонцæ мæн къæхтæмæ. Нур ба æз уони уавæри фæддæн æма уоми дæу æфсæддонтæ æнцæ фудгин. О, аллах! Кæмæй игурд æнцæ дæ адæм, ци тог цæуй се уæнгти?! Кæцæй сæмæ ес уæхæн тухæ æма нифс?!...
Уæдмæ æ фиди размæ фæззиндтæй паддзахи кизгæ – Зæринæ æ цардæмбали хæццæ. Базудтонцæ тæтæр-манголи æфсæдти уæлдæр тугъдон лæгтæ хани хæццæ, сæ богалбæл син ци силгоймаг фæууæлахез æй, уой æма деси бацудæнцæ. Хаудтæй сæ цъухтæй цидæр æнахур дзурдтæ; «О, алла! О, алла!»
Уой уингæй ходæг ниййахæста Зæрини, худтæнцæ Арис æма Асдигор дæр.
Хан æ уæраги сæргтæбæл бабурдæй паддзахи кизги размæ æма ин ниллæг ее сæрæй ковун байдæдта. Уæдмæ сии паддзах ислæууни барæ равардта. Хан, хатир ракоргæй, æрбахæссун кодта æ мулкитæ паддзахи размæ. Хурдзинтæ æма устур киритæ идзаг адтæнцæ сугъзæрийнæ æма æвзестæ дзаумæуттæй, æхцатæй. Æрттивтонцæ аллихузон хъазар дортæ. Хан загъта:
– О, кадгин паддзах! Аци мулкитæ æма хæзнатæ нурмæмæн адтæнцæ, фал тугъдон æгъдаумæ гæсгæ ба нур гъæу –аыа бафтуйонцæ дæу къохи, – хинæйдзаг худт бакодта æмакирæй исиста рæсугъд силгоймаги сæрвасæн, конд адтæйсугъдæг сугъзæринæ æма хъазар рæсугъд дортæй.
Хани зæрди адтæй, кæд уацайраг адтæй, уæддæр æ фæстаг бартæй балæвар кæнун аци сæрвасæн, æ размæ ци бæсти рæсугъд лæудтæй, уомæн.
– О, паддзах! – загъта хан. – Барæ мин радтæ мæнæ аци лæвар, дæ размæ ци рæсугъд – хори тунау, цæрдæг – саги хузæн, тухган – стаййи хузæн силгоймаг лæууй, уомæн радтун æ сæрæндзийнади туххæй.
Паддзах нидæн медбилхудт бакодта æма син балæдæрун кодта, е æ кизгæ ке æй, æ фарсмæ е ба æ сиахс. Бадаргъ кодта хан æ къох сæрвасæни хæццæ паддзахи кизгæмæ.
– Ескæмæй давд, тугхист ци сæрвасæн ракодтай мæн хузæн æригон уодæй, е мæн нæ гъæуй. Мæнæн сæребарæй уæлдæр æма зинаргъдæр неци ес æма мин уой ба балæвар кодтонцæ мæ зинаргъ фидæ, мæ цардæмбал æма нæ адæм. Дæ тогæйдзаг цъамар къохти фæд ниууадзунмæ гъавис дæ лæвари хæццæ мæнбæл æма дин нæ рауайдзæй.
Хан еци дзурдтæй ракуддæртæ æй, уæдта нæуæгæй æ къох бадардта Арисмæ æма ин загъта:
– Райсæ аци лæвар ду æма æй дæ цардæмбалæн радтæ. Дæу къохтæй æй гъæуама райса. Арис сæрбæрзондæй кастæй ханмæ. Æ тухгин къохæй ин раеуварс кодта æ къох æма загъта:
– Дæу хæзнайæй зинаргъдæр мæ царди нивæн уодзæй аци хæзна, – æма раласта æ къохæй рæсугъд къохдарæн зинаргъ дори хæццæ, æма æй бакодта Зæрини къохбæл.
Ханæн æ къохтаай сæрвасæн æрхаудтæй æма æ хъазар дортæ цæфæй алирдæмити рапурх æнцæ. Уæдмæ паддзах æ къохæй райамудта, гъома, «сæребарæ айтæ» æма хан æ фæсдзæуинтти хæццæ фендæдуар æй æ разæй. Асдигор, æ кизгæ æма сиахси хæццæ хебари райзайгæй, уошни æ хъурибуни æрбакодта æма цийни уолæфт исхаудтæи æ реуæй. Адгин ба ракодта æ кизги тæрнихæн æма искувта Хуцаумæ: – Мæ сабитæ! Гъенур ба арази дæн мæлæтбæл дæр! Ес мæ фæсте ка байзайдзæй æма мин мæ адæми ка багъæуай кæндзæй, ка рахæсдзæй фæткæбæл уæззау зунд æма æгъдау, царди раст надбæл ка рауадздзæй адæми, уæхæн дууæ сахъ игурди...
Æ цæститæ цийни цæстисугтæй райдзаг æнцæ. Нæуæгæй аланти паддзахади ниффедар æй райдзаст сæребарæ цард,. Паддзах хани хæзнатæ æма мулкитæ æ адæмæн байуарун кодта. Адæм адтæнцæ амондгун.
Мæнæ нур ци тохæй рацудæнцæ уæлахезæй, е фæстаг нæ адтæй сæ царди. Уой фæсте алантæ-дигорæбæл тухуаст уæззау бæллæхтæ æрцудæй, фал етæ æндæр хабæрттæ æнцæ...
Нур ба, идарддæр ци адтæй, уобæл радзордзæнæн... Еу рæстæгути фæсте паддзахи кизгæ – Зæринæн райгурдæй биццеу. Ном ин равардтонцæ Ботæгъаз. Кæми ма адтæй зæронд паддзахи цийнæн кæрæнттæ. Æ зæронди рæстæгутæ æрвиста æ минкъий хъæболи хъæболи хæццæ. Арæх-еу, хормæ уой æ къохти исивазгæй, исковидæ:
– О, устур Хуцау! Фегъустай мин мæ зæрди курдиæдтæ æма кувдтитæ æма мин сæ исæнхæст кодтай. Мæ бундор мин федарæй – федардæр кæнис. О, Хуцау! Уæлæбæл ди боз адтæн, мæрдти ба нигки боздæр уодзæн... Мæн зæронд уод ка барохс кодта, мæнæн ауæхæн хъазар лæвар ка ракодта, еци стур Хуцау, табу дæхецæн! – æма-еу уотемæй минкъий Ботæгъазæн фæлмæн хъури ракæнидæ. Минкъий Ботæгъаз дæр æ минкъяй къохтæ исивазидæ æ бабай цæсгонмæ æма ин гъазунтæ байдаидæ æ уорс рехæй.
Цард цудæй размæ. Аланти паддзахадæ ниффедар æй рæстæгути, Нæуæгæй бастдзийнадæ федар кодта паддзах Асдигор бæсти адæмти хæццæ. Боз адтæнцæ цардæй æд минкъий, æд устур. Фулдсерæй-фулдæр кодта адæми нимæдзæ, игурдæй нæуæг сахъ игурдтæ. Алирдигæй-еу фегъосун æнгъизтæй минкъий сувæллæнтти игъæлдзæг худт æма цъæхахст. Биццеутæ-еу, уесин бæхтæбæл рабадгæй, сæ минкъий церхъитæй думгæ алирдæмити сурдтонцæ; уомæй фæстагдæр нæ изадæнцæ кизгуттæ дæр саздахъæй æхсунмæ. Хестæртæ кодтоицæ зæнхæ æма фонси куст. Гъеууотемæй цудæй цард æма сæ хор æ фæлмæн тунтæй рæвдудта. Арæх-еу дзурдтонцæ алантæ-дигорæ: «Мах Хори Цæуæт ан, Хуцауи лæвар адæм».