Цæгат Ирыстоны телеуынынады кино, арæзт æрцыдис 1980-æм æзты райдианы
Архайынц дзы Цæгат Ирыстоны композиторты цæдисы фольклорон ансамбль "Чепена"-йы уæнгтæ æмæ Джызæлы хъæууон клубы аивадон къордтæ.
"Чепена"-йæн 1976 азы бындур сæвæрдта композитор Цорионты Резван. Æххуыс та йын кодтой ирон вокалон аивады дæсныдæртæй иу, композитор Бериты Алыбег æмæ уыцы заман райдайгæ хормейстер Дзанайты Оля. Уыдон иумæ систой ирон къордæй зарæрыны аивад ног бæрзæндтæм. Цæгат Ирыстоны паддзахадон ансамблæн йæ зарæггæнджыты къорд куы фехæлдис 1960-æм азты, уæдæй нырмæ уыцы аивад баззадис рохуаты, хъæуты хъиппæрисадон къордты бар æй бакодтой æмæ музыкалон æгъдауæй тынг фæцудыдта.
Цорионты Резван, зындгонд композитор уæвгæйæ, чысылæй фæстæмæ тынг бирæ уарзта адæмон аивад. Бирæ зындгонд классикон уацмыстæ рацыдис йæ къухæй, фæлæ уыдонимæ махæн уалдай æхсызгон сты, поэттæ Дзассохты Музафер æмæ Цæгæраты Гигоимæ кæй ныффыста, йæ уыцы "Гагкайты Алиханы зарæг", "Гасанты æфсымæрты зарæг", "Хъантемыраты Алыбеджы зарæг" (хъуысы ацы видеойы), "Барæг" æмæ йæ иннæ ирон зарджытæ. Бериты Алыбеджы сфæлдыстады дæр ирдæй æрттивынц иу къорд рæсугъд ирон зарæджы. Каст фæцис Мæскуыйы консерватори, бындуронæй зытта ирон фольклорон аивад, æмæ йын куыд ирон хормейстер, афтæ уæды рæстæджы æмбал нæ уыдис.
"Чепена" бирæ фæзылдис концерттимæ Ирыстоны хъæутыл, горæттыл, сыхаг республикæтыл, æмæ алы ран дæр адæмы зæрдæтæ рухс кодта йæ рæсугъд зарджытæй. Резван æмæ Алыбег æдзух æвæллайгæйæ куыстой къорды зардæн йæ музыкалон хæрхъæддзинад зынгæ фæхуыздæр кæныныл, профессионалон къæпхæнмæ йæ сисын. Уыимæ нæ адæмы хæзнадоны агурырдтой æмæ ног джиппы уагътой бирæ æзты рохуаты чи аззадис ахæм зарджытæ дæр. Зæгъæм, абон арæх кæй ис фехъусæн, уыцы "Тымбыл кафты зарæг " (Доны кæсаг) райгурдис дыууæ сæдæ азæй раздæр. Цорионты Резван æй арф æфснайæнты ссардта, æмæ йæ "Чепенайы" зардæй адæмы размæ ногæй рахаста.
Ныр рохуаты нал баззайдзæн, цæрдзæн æнусмæ. Нæ уыдзысты рохуаты "Чепена"-йы къухылдариуаггæнджытæ æмæ зарæггæнджытæ дæр. Бирæтæ дзы ацыдысты се'цæг дунемæ. Нал сты немæ Резван æмæ Алыбег, Моргуаты Эльбрус, Плиты Аслан, Гобеты Арсен, Моурауты Томофей, Тлаттаты Юрий, Джызæлы куырыхон хистæртæй бирæтæ.
Рухс дзæнæты бадæт.
Мæнæ ацы кино, радио æмæ телевиденийы иннæ рагон фыстыты фæрцы сын арæхдæр мысдзыстæм сæ ном æмæ сæ аивад.
Кучиты Руслан
Фольклорон ансамбль "Чепена"-йы 1970 æзты архайæг
